गोंय मुक्ती संघर्शाचो म्हालगडो सुटके झुजारी आनी लेखक नागेश करमाली (90) हांकां आयज दनपारां रायबंदर-पाटो हांगाच्या आपल्या घरा संवसाराक अतंरले. फाल्यां शुक्रारा सकाळीं 10 वरांचेर सांतिनेझ हांगाच्या मसणभुंयेंत ताची कूड लासतले. भलायकी इबाडिल्ल्यान तांकां 05 फेब्रुवारीच्या वाडदिसाक हॉस्पिटलांत दाखल केल्लो. ताची स्थिती सुदारता म्हणून ताका घरा हाडलो.
गोंय मुक्ती संघर्शांत वरिश्ठ सुटके झुजारी आनी लेखक नागेश करमाली हांकां मरण आयिल्ल्याची खबर दुख्खाची. ताच्या पवित्र आत्म्याक शांती मेळूं. गोंयचे सुटके खातीर ताणें केल्ल्या योगदानाचो गोंय सदांच याद उरतलो. अशा उतरांनी मुख्यमंत्री सावंत हांणी दुख्ख उक्तायलां.
जाल्यार,म्हालगडे सुटके झुंजारी आनी कोंकणी लेखक, कवी बाब नागेश करमली हांका आज मर्ण आयलें. तांचे घरचें आनी बरें मागप्यांच्या दुखकांत हांव वाटेंकार आसां. तांचे आत्म्यांक शांती मेळूं. अशा उतरांनी विरोधी पक्ष फुडारी युरी आलेमाव हांणी दुख्ख उक्तायलां.
करमाली हाचो जल्म 1933 वर्सा काकोडे हांगा जालो. नागेश करमाली हाचो भारत सरकारान 1972 वर्सा तांब्याची प्लेट दिवन भोवमान केलो. १९९२ वर्सा ताच्या ‘वंशकुलाचे ‘देणे’ ह्या कविता संग्रहाक साहित्य अकादमीचो पुरस्कार फावो जालो.
2008 वर्सा तेन्नाचे राष्ट्रपती प्रतिभा पाटीलान ताचो भोवमान केलो. कोंकणी भास मंडळाची थापणूक करपाक तांचो मुखेल वांटो आशिल्लो. ताणें कोंकणींतल्यान गजल या काव्यप्रकारची वळख करून दिली.
