कोंकणी भाशा मंडळाचे पुरस्कार जाहीर

मडगाव:
कोंकणी भाशा मंडळाचे वर्स 2026 खातीर वर्सुकी पुरस्कार जाहीर जाल्यात आनी मंडळातर्फे आयोजीत पत्रकार परिशदेंत ह्या पुरस्कारांची घोशणा केल्या . कोंकणी भाशा मंडळाच्या 64 व्या वर्धापन दीसा निमतान आयोजीत कार्यावळींत हे पुरस्कार भेटयतले. हो सुवाळो 2 ऑक्टोबराक गोमंत विद्या निकेतन, मडगांव हांगा सांजेच्या 4 वरांचेर  जातलो.

कोंकणी भाशा मंडळ पुरस्कृत सेवा पुरस्कार ह्या वर्सा फादर मायकल फेर्नांडीस, फादर लिनो फ्लोरिनांडो, सुरंगा मडकयकर, हिरू नायक, सुरेश कोलवेकार हांकां भेटयतले. सॅराफीन कोता पुरस्कृत फेलिस्यु कार्दोज उगडासा खातीर शिक्षक पुरस्कार (प्राथमिक आनी माध्यमिक विभाग) स्वाती नायक, विजय सरदेसाय पुरस्कृत माधवी सरदेसाय शिक्षक पुरस्कार (उच्च माध्यमिक आनी महाविद्यालय विभाग) सुचेता पै हांकां, तर लिगोरिओ फुर्तादो ट्रस्ट उगडासा खातीर पत्रकारिता पुरस्कार अतुल पंडित हांकां आनी दिनेश मणेरकर पुरस्कृत चंद्रकांत केणी उगडासा खातीर स्तंभलेखन पुरस्कार ब्रदर जॉन आल्फान्सो हांकां भेटयतले.

विन्सी क्वाद्रोस पुरस्कृत जुजे पियेदाद हांच्या उगडासा खातीर कार्यकर्तो पुरस्कार उल्हास गांवकार, रूपेश ठाणेकार, सुचिता नार्वेकार हांकां भेटयतले. फा. मोरेन डिसोझा उगडासा खातीर युवा साहित्य पुरस्कार श्रद्धा गरड हिका आनी विक्रम वेर्लेकार पुरस्कृत युवा उद्योजिका पुरस्कार गौतमी रायकार हिका फावो जाला. बाल साहित्य पुरस्कार श्रीकांत नागवेंकर हांच्या ‘नवलांच्यो विज्ञान कथा’ ह्या पुस्तकाक फावो जाला.

रूपा राजेश केणी हांच्या ‘विजमीत आनी हेर कथा’ ह्या पुस्तका खातीर रॉक बार्रेट साहित्य पुरस्कार, तर फादर रोमन रोड्रिगीस हांच्या ‘धागे’ ह्या रोमी लिपींतल्या पुस्तकाक श्रीधर कामत इश्ट परिवार पुरस्कृत श्रीधर कामत साहित्य पुरस्कार फावो जाला. शीतल नंदकुमार परब हांच्या ‘गांवां कडल्यो कविता’ ह्या कविता झेल्याक कोंकणी भाशा मंडळ पुरस्कृत रमेश वेळुस्कर साहित्य पुरस्कार भेटयतले. दिनेश मणेरकर पुरस्कृत रामनाथ मणेरकर अनुवाद पुरस्कार योग्य पुस्तक नाशिल्ल्यान दिवंक ना.

ह्या पुरस्कारां खातीर परिक्षक मंडळ म्हूण:
सेवा पुरस्कार- डॉ. नारायण देसाय, संदेश प्रभुदेसाय, वसंत भगवंत सावंत
कार्यकर्तो पुरस्कार – प्रशांत नायक, साईश पायणेंकार, अन्वेशा सिंगबाळ
फेलिस्यु कार्दोज शिक्षक पुरस्कारा खातीर – अनंत अग्नी, दिलीप नायक, एच. मनोज
माधवी सरदेसाय शिक्षक पुरस्कारा खातीर – डॉ. प्रकाश वझरीकार, काश्मीरी पावसकार, तृप्ती कुंकळ्येंकार
पत्रकारिता आनी स्तंभलेखन पुरस्कारा खातीर – फावुस्तो डिकोस्ता, प्रमोद आचार्य, महेश दिवेकार
युवा साहित्य पुरस्कारा खातीर – अंजू साखरदांडे, डॉ. राजय पवार, फा. मायरन बार्रेटो
साहित्य पुरस्कारा खातीर – डॉ. किरण बुडकुले, प्रशांती तळपणकार, फा. लुईस गोम्स
युवा उद्योजिका पुरस्कारा खातीर – राजेश प्रभू, राधाकांत दिवकार, पराग लोलयेंकार
बाल साहित्य पुरस्कारा खातीर – नयना आडारकार, चेतन आचार्य, कविंद्र फळदेसाय हांणी काम पळयलें.