कोंकणी लेखक आनी कार्यकर्ती अन्वेषा सिंगबाळ कोंकणी भाशा मंडळ, गोंयची अध्यक्ष म्हूण दुसर्या कार्यकाळा खातीर बिनविरोध वेंचून आयल्या. 2023-2026 ह्या कार्यकाळा खातीर ही नवी समिती वेंचून आयल्या.
कोंकणी भाशा मंडळाची साबार बसका 30 एप्रिलाक मडगांवां जाली. ह्या बसकेंत मंडळाचे 12 वांगडी तशेंच 12 तालुका प्रतिनिधी बिनविरोध वेंचून आयले. रुपेश कामत हांणी वेंचणूक अधिकारी म्हूण काम सांबाळ्ळे. नव्या समितीन आयज 14 मे दिसा आपले पदाधिकारी वेंचून काडले. ही समिती जुनाच्या निमण्या आयतारा म्हळ्यार 25 जुनाक आपलो ताबो घेतली. तो मेरेन आदली समिती कार्यरत आसतली.
अन्वेषा सिंगबाळ हांची चार कवितांची पुस्तकां प्रकाशीत जाल्यांत. सुलूस ह्या तांच्या कविता झेल्याक साहित्य अकादेमीचो युवा पुरस्कार फावो जाला. 2008 वर्सां सावन त्यो कोंकणी भाशा मंडळा कडेन जोडिल्ल्यो आसात. 2012 वर्सा त्यो कोंकणी भाशा मंडळाच्यो सचीव जाल्ल्यो. शणै गोंयबाब कथामाळ, गोवा युवा महोत्सव, बाल साहित्य परिशद धरून मंडळाच्या वेगवेगळ्या कार्यावळींचें संयोजन तांणी केलां.
आपलो पयलो कार्यकाळ चडसो कोवीड-19 आनी लॉकडावनाच्या सावटा खाला गेलो. अशें आसून लेगीत तंत्रगिन्यानाच्या आदारान मंडळान आपलें काम चालू दवरलें. ह्या कार्यकाळांत मंडळाच्या कामाक अदीक गती लाभतली अशें नवी अध्यक्ष अन्वेषा सिंगबाळ हांणी सांगलें. कोंकणी खातीर नवीन तरणाटे घडोवप आनी वेगवेगळ्या मळार कोंकणी भास आनी संस्कृताय सशक्त करपाच्या नदरेन आपली समिती काम करतली अशें तांणी ह्या वेळार सांगलें.
कोंकणी भाशा मंडळाची नवी कार्यकारी समिती 2023-2026 :
अध्यक्ष: अन्वेषा सिंगबाळ
उपाध्यक्ष: रत्नमाला दिवकार
सचीव: मंगलदास भट
भांडारी: डॉ. पुरूशोत्तम वेर्लेकार
जोड सचीव: डॉ. वेदिका वाळके
जोड सचीव: वल्लभ बर्वे
केंद्रीय समितीचे वांगडी :
हृषीकेश कदम
मार्कुस गोन्साल्वीस
शलाका देसाय
पलाश अग्नी
राजेश प्रभू
रुपेश ठाणेकार
तालुका प्रतिनिधी :
सज्जन देसाय (काणकोण म्हाल)
मंगलदास (यतीन) नायक (केंपें म्हाल)
सबिना मुल्ला (साश्ट म्हाल)
जग्गनाथ (मिथुन) गुरव (सांगें म्हाल)
चेतन खेडेकार (फोंडें म्हाल)
गौरीश नायक (मुरगांव म्हाल)
मृणाल लोलयेंकार (तिसवाडी म्हाल)
प्राची प्रभावळकार वर्दे (बार्देस म्हाल)
राधिका सातोस्कार (दिवचल म्हाल)
नमन धांवस्कार सावंत (सत्तरी म्हाल)
केशव महाले (पेडणें म्हाल)
अमेय नायक (धारबांदोडें म्हाल)
स्विकृत वांगडी :
समिक्षा पै धुंगट
रंजन नायक
गौरांग भांडिये
