कोची:
कोंकणी अस्मिताय दिसा निमितान कोचींत केरळ कोंकणी अकादमी आनी गोंयबाब यादस्तीक, पर्वरी, गोंय संस्थेंचें जोडपालवान शेणै गोंयबाब स्मारक प्रस्नोत्तरी कार्यावळ घडयली.
कोची तिरुमल देवस्वम पूर्व भागाकडेच्या सारस्वत असोसिएशन सभाघरांत आयोजीत केल्ले कार्यावळीचे ज्येष्ट साहित्यिक आर.एस.भास्कर हांणें दिवली पेटोवंन उक्तावण केल्ले. अकादमीचे अध्यक्ष पी.एन.कृष्णन हें यजमान आशिल्ले. सरकार्यदर्शी चन्द्रबाबू यु.शेटी हांणे येवकार दिलो. सदानंद भट, प्रो.जी.मोहनराव, प्रो.के.रमेश भट, रविन्द्रन हांणीं उलेयले.
उपरांत घडयलें शेणै गोंयबाब स्मारक प्रस्नोत्तरी सर्तींत सबार विद्यार्थ्यांनी वांटो घेतलो. प्रस्नोत्तरी सर्तीचे क्विस मास्टर म्होण चन्द्रबाबू शेटी आनी सहाय्यक डाॅ.विद्या विजयकुमार आशिल्लीं.
प्रस्नोत्तरी सर्तींत पयले इनाम 3000 रोख प्रणव कृष्णा एन.बी.,(एडवर्ड मेम्मोरियल गवर्णमेण्ड एच.एस.एस.), दुसरें इनाम 2000 रोख अद्वैत ए.शेणै, तिसरें इनाम 1000 रोख भाग्यलक्ष्मी हेगडे आनी प्रोत्साहन इनाम कार्तिक अनील शेणै (तिरुमल देवस्वम एच.एस.) हांकां फावो जाल्लें.
अकादमीचे अध्यक्ष पी.एन.कृष्णन आनी डाॅ.विद्या विजयकुमार हांणी जैतिवंतांक इनामां भेटेयलीं.
