मडगांव : म्हजें घर येवजणे खातीरचो कायदो हो खोलायेन अभ्यास करुनूच तयार केला. ताका लागून कसल्याच न्यायालयीन निर्णयाक लागून ह्या कायद्याक आडखळ येवची ना, असो विस्वास आसा. एका प्रकरणांत उच्च न्यायालयांत लेगीत राज्य सरकार पुराय तयारी वरवीं आपली बाजू मांडटा, अशें मुख्यमंत्री डॉ. प्रमोद सावंत हांणी सांगलें.
दक्षीण गोंय जिल्हो भाजप कार्यालयांत सोमारा सांजे वेळार मुख्यमंत्री डॉ. सावंत हांणी भाजप कार्यकर्त्यांची भेट घेतली. ह्या वेळार कार्यकर्त्यांनी विवीध समस्या मुख्यमंत्र्या मुखार मांडल्यो. हे कार्यावळी उपरांत उलयतना मुख्यमंत्र्यान सांगलें, भाजपाच्या कार्याकर्त्यांक मेळपा खातीर उत्तर गोंय, दक्षीण गोंय, पणजी कार्यालयांत कार्यावळींचें आयोजन करतात. कार्यकर्त्यांनी विवीध समस्या आनी प्रस्न मांडल्यात. हातूंतल्यो चडश्यो समस्या ह्यो मामलेदार, जिल्होधिकारी कार्यालय हाचे सयत ‘म्हजें घर’ हाचे कडेन संबंदीत आसात. चड समस्या ह्यो म्हजे घर संबंदांत मुखार आयल्यात. ते भायर कांय जाणांच्यो बदल्या संबंदांतल्यो मागण्यो आशिल्ल्यो. तातूंतल्यो चडांत चड समस्या बेगिनूच सोडयतले, अशें मुख्यमंत्र्यान स्पश्ट केलें.
प्रसार माध्यमांनी सर्वोच्च न्यायालयाच्या टेनंट कायद्या विशीं सर्वोच्च न्यायालयान बिराडकारान कितलोय काळ मालमत्ता वापरली तरीय तो बिराडाचे मालमत्तेचो धनी केन्नाच जावपाक शकना, असो निकाल दिला. हाचो संदर्भ दिवन प्रसारमाध्यमांनी गोंयांत हाचो परिणाम जातलो काय कितें, असो प्रस्न केलो. त्या वेळार मुख्यमंत्र्यान सांगलें, सर्वोच्च न्यायालयाचो हे संबंदांतलो निर्णय आपूण वाचूंक ना. ते विशीं कायदेशीर सल्लो घेतले आनी ते उपरांतूच ताचेर भाश्य करतले. म्हजें घर हे येवजणे खातीर जो कायदो केला, तो पुराय कायदेशीर अभ्यास केले उपरांतूच तयार केला. म्हजें घर येवजणे आड उच्च न्यायालयांत लेगीत एका प्रकरणांत गोंय सरकार योग्य तरेन लडो दिता, हाचो कसलोच परिणाम म्हजें घर येवजणेचेर जावचे ना, हाची आपल्याक 100 टक्के खात्री आसा, अशेंय मुख्यमंत्र्यान सांगलें.
मुख्यमंत्र्यां कडेन संवाद सादतना प्रसार माध्यमांनी, दक्षीण गोंयांत एसटी फुडाऱ्यांचे जाल्ले बसकेचो संदर्भ दिवन एसटी समाजाक राजकी आरक्षण दिवपा विशींचे भुमिकेचेर प्रस्न केलो तेन्ना मुख्यमंत्र्यान सांगलें, हाचेर प्रक्रिया चालू आसा. ताचेर तांणी आनीक कसलेंच भाश्य करूंक ना.
कारापूरच्या प्रकल्पा आडचें आंदोलन आतां दिल्ली मेरेन पावलां. हे विशीं मुख्यमंत्री डॉ. सावंत हांकां विचारलें तेन्ना तांणी सांगलें, हो प्रस्न सध्या न्यायप्रविश्ठ आसा. पंचायती कडल्यान हे संबंदांत जो निर्णय घेवपाक जाय तो तांणी घेतला. हं संबंदांत न्यायालयीन खटलो चालू आसा, अशें तांणी सांगलें.
झोंपडपट्टी पुनर्वसना खातीर वेगळें धोरण
गोंयांतल्या झोंपडपट्टी पुनर्वसनाचो प्रस्न सोडोवपाची प्रक्रिया चालू आसा. पूण गोंयांतलो अधिसुचीत झोंपडपट्टी वाठार उण्या प्रमाणांत आसा. गोंयांत फक्त एक दोनूच झोपडपटट्ट्यो अधिसुचीत आसात. ताका लागून पुनर्वसना खातीर वेगळें धोरण तयार करतले, अशी म्हायती मुख्यमंत्री डॉ. सावंत हांणी दिली.
