उदय नरसिंह म्हांबरो हांणी बरयल्ल्या “काळीज उसवलां” ह्या कोंकणी पुस्तकाचो केरळचे लेखक बाळकृष्ण मल्ल्या हांणी मल्ल्याळम भाशेंत अणकार केला. ह्या पुस्तकाक 2023 वर्साचो कोंकणी भाशा मंडळ ‘रमेश वेळुस्कार पुरस्कार’ फावो जाल्लो. “हृदयकेट्टू अझिनजापोळ” ह्या नांवान केल्ले हें अणकाराचे पुस्तक केरळचे मानादिक राज्यपाल राजेंद्र विश्वनाथ आर्लेकार हांचे हस्तुकी सोमारा 17 फेब्रुवारी दिसा सांजेच्या पांच वरांचेर कोचिनांत लोकार्पण जातलें. हि कार्यावळ एर्नाकुलम हांगा एस. एन. व्हि. सदनम च्या सभाघरांत जातली.
प्रतिष्ठेचो केरळ ज्योती पुरस्कार विजेता मल्ल्याळम साहित्यीक आनी समिक्षक प्रा. एम. के. सानू हांका पुस्तकाची पयली प्रत ह्यावेळार भेटयतले. तशेंच राज्यपालांच्या हातान अनुवाद करपी लेखक बाळकृष्ण मल्ल्या हांचो भौमान जातलो. महाराजा कॉलेजचे इतिहासाचे प्राध्यापक विनोदकुमार कल्लोळीक्कल ह्या सुवाळ्याचे यजमानपद करतले. सुर्वेक प्रबोधा पब्लिकेशन्सचे सचिव. डी. डी. नवीनकुमार येवकार दितले तर कोचिनांत कोंकणीचो मोठो वावर करपी पि. जी. कामत फावंडेशनचे विश्वस्त आनंद कामत पुस्तकाचेर उलोवप करतले.
कोंकणी पुस्तकाचो मल्ल्याळम भाशेंतलो अणकार कोचिनच्या प्रबोधा ट्रस्टाच्या मालकिच्या प्रबोधा पब्लिकेशन्स ह्या संस्थेन छापून उजवाडायला. “प्रबोधा ट्रस्ट” हि संस्था समाज प्रबोधन आनी संस्कारक्षम कार्यावळी आनी प्रकाशनां घडोवन हाडटा.
