गोंय
– शर्वाणी काशिनाथ नाईक
स्वतंत्र तुकां करूंक तांणी
जीण आपली ओंपली
तेन्नाच तुजे भुंयेर
स्वातंत्र्याची फांतोड उदेली
स्वतंत्र गोंयां तुका
मेळळीं दोन भावणणां
गोंय, दमण दीव
संघ राज्याची जाली स्थापना
स्वातंत्र्याची गोडी चाखतना
मदोंच पडलो खडो मिठाचो
तुका महाराष्ट्रांत विलीन करपाचो
निर्णय जालो थोड्यांचो
परक्यांक धांवड्यांक
एकठांय पूत तुजे जाले
तुजी अस्मिताय राखूंक
दोन दिकांक उबे रावले
कोंकणी, मराठी भाशेच्यो
चळवळी तुवें पळयल्यो
स्वतंत्र राज्य जावपाचो
मान तुवें मेळयलो
तुज्या मातयेंतल्या कोंकणीक
राज्यभाशेचो दर्जो दिलो
संविधानाच्या आठवे वळेरेंतय
मान तिणे मेळयलो
….
माणकुलें गोंय आमचें
– प्रसाद तुकाराम सावंत
माणकुलें गोंय आमचें
गोंयकाराचें अपुरबायेचें
व्हांवत्यो न्हयो धोलतीं शेतां
गीत गाता तें खुशालकायेचें
पांचवीं पांचवी शेतां गोंयचीं
दाखयेता गोंयची उदरगती
शेतकार वावराडी,
गोंयचो धनी
घरकान्न ताची
गोंयची राणी
कुदळ खोरें आमचे धन
सदांच आमचें निर्मळ मन
कश्टाची भाकरी खाऊन
धाधोसकायेची जियेता जीण
देवळां मसिदी
इंगर्जी हांगा
दाखयेता गोंयची एकवटाय
भेदभाव कसलो
मानीना आमी
एकुण आमची अस्मिताय
माणकुलें गोय आमचें
…
घटक राज्य
– पुष्पा नायक
विशाल भारताचें सुपुल्लें दायज
आजच्या दिसा जालें घटक राज्य ॥धृ॥
गोंयान आपलें दायज राखलें
भाशेन ताका जेल दिलें
राजभास कोंकणी करून
आयकयलो आपलो गाज ॥1॥
म्हादय आसा गोंयची गंगा
जुवारींत आमचो जीव दडला
पर्वतांनी उखलून धरला
पावसाचो साज ॥2॥
दर्यांतलो नुस्त्या कांटो
शेतांतलो भाता गोटो
सैमाच्या पोटांत रावूंक
घालो आमी साद ॥3॥
शांतताये पुजारी आमी
देवधर्म मानपी मानी
घटक राज्याक पाळो दिता
एकचाराचो नाद ॥4॥
