पणजी : गोवा कोंकणी अकादेमीन 2026-2027 ह्या अर्थीक वर्सा खातीर साहित्य, संशोधन, शिक्षण आनी सांस्कृतिक क्षेत्रांत कार्य करपी लेखक, प्रकाशक, संस्था आनी विद्यार्थ्यां खातीर विविध येवजण्यो जाहीर केल्यात. ह्या येवजण्यां खातीर इत्सूक लेखकांकडल्यान, प्रकाशकांकडल्यान, संस्थांकडल्यान आनी विद्यार्थ्याकडल्यान अर्ज मागयल्यात.
लेखक आनी प्रकाशकां खातीर जाहीर केल्ल्या येवजण्यांत पयलो चंवर येवजण (लेखकाचें पयलें पुस्तक उजवाडावपा खातीर 75 टक्के अर्थीक पालव), साहित्य प्रभा येवजण (पुस्तक उजवाडावपा खातीर 70 टक्के अर्थीक पालव), बालसाहित्य प्रकाशन, कोंकणी नाटक-मांड येवजण, लोकवेद पुस्तक प्रकाशन, शिक्षणीक साहित्य प्रकाशन, लिप्यांतरीत पुस्तक प्रकाशन आनी अणकारीत पुस्तक प्रकाशन ह्या येवजण्यांचो आस्पाव जाता.
तशेंच प्रतिभा सन्मान येवजणेंतर्गत जानेवारी 2024 ते डिसेंबर 2025 मेरेन प्रकाशित जाल्ल्या पुस्तकांची विकत घेवन प्रकाशकांक पालव दिवपाची सोय केल्ली आसा. हाचे भायर क्लारिसा वाज ई मोरेनास संशोधनवृत्ती, संगीत साहित्य पुस्तक प्रकाशन, दुर्मीळ साहित्य पुनर्उजवाडावणी, वेंचीक पुस्तक प्रकाशन आनी हेर साहित्यिक येवजण्योय जाहीर केल्यात.
संस्था आनी विद्यार्थ्यां खातीर शिक्षणीक, बालसाहित्य, लोकवेद, अणकार आनी संगीत ह्या विषयांचेर कृतिसत्रां वा शिबिरां आयोजीत करपा खातीर अर्थीक पालव दिवपाची तरतूद आसा. 50 जाणांचे सोये खातीर 35 हजार रुपयां आनी 100 जाणांचे सोये खातीर 50 हजार रुपयांचो पालव दिवपाचें जाहीर केलां.
हाचे भायर लेखक-विद्यार्थी भेट, कोंकणी शिक्षणीक शिश्यवृत्ती (बी.ए., एम.ए. आनी पीएच.डी. पांवड्यांर शिकपी विद्यार्थ्यां खातीर), कोंकणी संगीत कार्यावळ निर्मीती, कोंकणी संशोधनवृत्ती आनी कोंकणी अभ्यास प्रकल्प ह्या येवजण्यां खातीरय अर्ज मागयल्यात.
ह्या सगळ्या येवजण्यांची अर्जीपत्रां गोवा कोंकणी अकादेमी, गोवा संचार भवन, बी.एस.एन.एल. बिल्डींग, 5 वो माळो, पाटो, पणजी-गोंय हांगाच्या कार्यालयांत उपल्ब्द आसात.
इच्छूकांनी आपले अर्ज 23 जून 2026 मेरेन सादर करचे आसात. अधिक माहिती खातीर 7775891857 ह्या फोन क्रमांकाचेर संपर्क साधपाचो, अशें अकादेमीन जाहीर केलां.
