मडगांव: कोंकणी भास, कला, संघटन आनी संस्कृतायेच्या मळार देखदिणो वावर केल्ल्या म्हालगड्यांचो गौरव करपा खातीर ‘भांगराळें गोंय अस्मिताय’ संस्था दर वर्सा ‘भांगराळो गोंयकार पुरस्कार’ दिवन सन्मान करता. ह्या वर्साचो हो पुरस्कार ज्येश्ठ सिने आनी नाट्य कलाकार, लेखिका प्रशांती तळपणकार हांकां फावो जाला.
प्रशांती तळपणकार हांणी विद्यार्थी चळवळींत सक्रिय वांटो घेवन समाजांतले वेगवेगळे प्रश्न पथनाट्यांच्या माध्यमांतल्यान लोकां मुखार मांडल्यात. कोंकणी नाटक, एकांकीका आनी सिनेमांत अभिनय करून तांणी राज्य, राश्ट्रीय आनी संवसारभर मानाचे पुरस्कार फावो केल्यात. तांच्या ‘दीर्घ मौन तें’ ह्या अणकारीत ग्रंथाक 2017 वर्सा साहित्य अकादेमीचो अनुवाद पुरस्कार फावो जाला.
‘भांगराळें गोंय’चे संस्थापक वांगडी सर्गेस्त नित्यानंद नायक हांच्या उगडासाक संस्थेन ‘नित्य युवा’ पुरस्कार सुरू केल्लो आसा. कोंकणी भास, कला आनी संघटन क्षेत्रांत सातत्यान योगदान दिवपी तरणाट्यांचो गौरव ह्या पुरस्कारांतल्यान केलो जाता. ह्या वर्साचो ‘नित्य युवा’ पुरस्कार युवा कवी आनी कलाकार महादेव सातू गांवकार हांकां जाहीर जाला.
महादेव सातू गांवकार हांणी राश्ट्रीय आनी अखिल गोंय सुवातेचेर जावपी कविता स्पर्धांनींत पुरस्कार फावो केल्यात. तांचो ‘वझरो’ हो कविता संग्रह उजवाडाक आयला आसा. सत्तरी तालुक्यांतलो लोकवेद, रणमाल्यांतल्यो जाती, सोकारती, फुगडी आनी लग्नगीतांचें संकलन करपाचो वावर ते सातत्यान करतले. तशेंच कोंकणी भजन, दिंडी आनी रणमालें अशा वेगवेगळ्या लोककलाप्रकारांनीं ते गायन आनी वादन सादर करतले.
पुरस्कार प्रदान सुवाळो आयतार, 21 जुनाक, मडगांवच्या रवींद्र भवनाच्या कॉन्फरन्स हॉलांत सांजे 4 वाजतां जातलो. ही कार्यावळ सगळ्यां खातीर उक्ती आसा.
