गोंयचे संमतीनूच कर्नाटकाक म्हादयचें उदक दिवपाचो निर्णय घेतला. केंद्रीय गृहमंत्री अमित शाह हांच्या विधानाक लागून राज्यांतले नागरिक आक्रमक जाल्यात आनी असंतोश वाडला. हे विशीं मंत्र्यांक विचारलें तेन्ना ते प्रसार माध्यमांक टाळपाचो यत्न करतात आनी ह्या प्रकरणांत मुख्यमंत्र्याचेर बोटां दाखयतात.
कर्नाटकांत केंद्रीय गृहमंत्री अमित शाहान जाहीर केलें की गोंयचे संमतीनूच उत्तर कर्नाटकांतल्या शेतकारांक म्हादाई उदक दिवपाचो निर्णय घेतला आनी ताका लागून कर्नाटकांतल्या शेतकारांक हें उदक मेळटलें.
मजगतीं, हाका लागून लोकांचो पारा चड वाडटा अशें दिसता. माध्यम प्रतिनिधींनी राज्यांतल्या मंत्र्यांक हे संबंदी जाप विचारपाचो यत्न केलो तेन्ना तांचे कडल्यान वेगवेगळीं जाप येवंक लागलीं.
आज सकाळीं पर्यटन मंत्री रोहन खंवटे आपल्या कार्यावळीच्या निमतान पर्यटन भवनांत आयलो तेन्ना पत्रकारांनी ताका विचारपाचो यत्न केलो तेन्ना तो दुसऱ्या दारांतल्यान भायर सरलो.
भलायकी मंत्री विश्वजीत राणे आयज कॅन्सर दिसा कार्यावळी खातीर हाजीर आशिल्ले. हे विशीं तांकां विचारलें तेन्ना तांणी ‘मुख्यमंत्री सावंत हाचेर सरकाराचें मत मांडटलो, तुमी ताका विचारचें’ अशें सांगून ही गजाल न्हयकारली.
ते उपरांत भौशीक बांदकाम मंत्री निलेश काब्राल हांणी गृहमंत्री शाह हांच्या विधानाचेर आपूण निशेध करता अशें सांगलें.
केंद्रीय गृहमंत्री अमित शाहाच्या विधानाक हांव मान्य ना, आमी आमची केस न्यायालयांत सादर करतात आनी न्यायालय आमकां फावो तो न्याय दितली, आमी खंयचेच परिस्थितींत कर्नाटकांत उदक वळोवचे नात अशें उदका संसाधन मंत्री शिरोडकार हांणी सांगलें. म्हणलें.
दुसरे वटेन मुख्यमंत्र्यान ‘आमची न्यायीक बाजू घटमूट’ असो दावो केला.
