पणजीः
भंडारी समाजाच्या फुडाऱ्यांनी जाती प्रमाण जनगणना करपाची मागणी भारतीय जनता पक्षाचोय सकारात्मक प्रतिसाद मेळपाक लागला. भाजपाचे प्रदेश अध्यक्ष दामू नायक हांणी पत्रकारां कडेन उलयतना स्पश्ट केलें की ह्या विशयाचेर पक्षाचे मुळावे समितीचे बसकेंत चर्चा जातली.
तेच बरोबर फुडल्या दिसांनी राज्य सरकार जाती प्रमाण जनगणना नक्कीच करतलें असो खर विस्वास केंद्रीय मंत्री श्रीपाद नायक हांणी उक्तायला. मजगतीं, येवपी विधानसभा अधिवेशनांत हे संबंदी खाजगी थाराव हाडपाची तयारी विरोधी पक्ष फुडारी करतात.
दयानंद मांद्रेकार, दिलीप परुळेकार, किरण कांदोळकार ह्या भंडारी समाजांतले नामनेचे फुडारी फाटल्या कांय म्हयन्यां सावन राज्यांत जाती प्रमाण जनगणना करची अशी मागणी सरकारा कडल्यान सतत करतात. फाटल्या कांय दिसां सावन हे फुडारी विरोधी पक्षांच्या मुखेल्यां कडेन बसका घेतात आनी हो प्रस्न विधानसभेंत प्रभावीपणान मांडचो अशी मागणी करतात. इतलेंच न्हय, “राज्य सरकारान आमची मागणी मान्य ना जाल्यार आमी स्वता जाती प्रमाण जनगणना करतले” अशीय शिटकावणी ह्या फुडाऱ्यांनी सरकाराक दिल्या.
हे फाटभुंयेर उलयतना भाजपाचे प्रदेश अध्यक्ष दामू नायक हांणी म्हणलें, समाजाच्या फुडाऱ्यांनी आपलो समाज गणीत करपाची मागणी केल्यार कांयच चूक ना. भाजपाचो राज्य अध्यक्ष म्हूण सगळे समाज म्हजे खातीर म्हत्वाचे आसात. देखून भंडारी समाजाच्या फुडाऱ्यांनी केल्ली मागणी पक्षाच्या मुळाव्या समितीच्या फुडले बसकेंत नक्कीच चर्चा जातली. जाती प्रमाण जनगणनेचो प्रस्न मुखार येता राज्य सरकाराचो व्याप्ती आनी अशे प्रस्न फकत चर्चा करून सोडयतात अशें तांणी सांगलें.
“जाती प्रमाण जनगणनेक सरकारान केन्नाच विरोध केल्लो ना. भंडारी समाजाच्या फुडाऱ्यांची ही मागणी राज्य सरकार नक्कीच पुराय करतलें. हांव स्वता सरकारा कडेनय हे विशीं चर्चा करतलों,” अशें केंद्रीय मंत्री श्रीपाद नायक हांणी आश्वासन दिलें. राज्य सरकारान बेगीनांत बेगीन जाती प्रमाण जनगणना केल्यार फुडाराक जायते प्रस्न सुटावे करपाक मदत जातली अशेंय तांणी सांगलें.
