पणजी:
विधानसभा वेंचणुकेक अजून दोन वर्सां उरल्यात. ह्या दोन वर्सांत आमी जियेतले काय ना हें सांगप शक्य ना. जिणेंत आशा ना अशें वीज मंत्री आनी मगोचे वरिश्ठ फुडारी सुदीन ढवळीकार हांणी पत्रकारां कडेन उलयतना सांगलें.
सध्या भाजपान सगल्या चाळीस मतदारसंघांनी काम सुरू केलां, आनी राज्य अध्यक्ष दामू नायक हांणी येवपी विधानसभा वेंचणुकेंत सगल्या चाळीस मतदारसंघांनी लढो दितले अशें जाहीर केलां. विधानसभा वेंचणुकेंत ताचो परिणाम भाजपा-मगो युतीचेर जातलो काय कितें असो प्रस्न पत्रकारांनी सुदीन ढवळीकाराक विचारिल्लो.
हाचेर उलयतना ताणें जाप दिली, “विधानसभा वेंचणुकेक अजून दोन वर्सां उरल्यात. ह्या दोन वर्सांत हांव थंय आसतलो काय ना तें म्हाका खबर ना. जिविताची आस्त ना. हांव जिवो आसल्यार राजकारणांत आसतलों.”
मागो उमेदवार आशिल्ल्या मांद्रे हांगा येवपी विधानसभा वेंचणुकेंत भाजपा उमेदवार उबो करतले अशें जाहीर केल्या उपरांत मुख्यमंत्री डॉ.प्रमोद सावंत हांणी प्रियोलांतय भाजपाचो उमेदवार आसतलो अशें स्पश्ट केलें. तशेंच “हाका मान्य नाशिल्ल्यांनी आतांच वचचें” अशें तांणी स्पश्ट केलें.
