गोंयचे तीन दिसांचे भेटेर आयिल्ल्या मध्य आशियाई युवा शिश्टमंडळान राज्यपाल पी. एस. श्रीधरन पिल्लई हांची राजभवना वयल्या पोरण्या दरबार हॉलांत काल भेट घेतली. ह्या वेळार राज्यपालान शिश्टमंडळाच्या वांगड्यां कडेन संवाद साधलो. भारत आनी मध्य आशियाई राष्ट्रांमदीं युवा सहकार्य, सांस्कृतीक देवाणघेवाण आनी राजकीय संबंध घटमूट करप हो हे भेटीचो उद्देश आसा.
ह्या वेळार गोंयचे कला-संस्कृती आनी खेळांमंत्री गोविंद गावडे, राज्यपालांचे सचीव एम आर एम राव आनी भारत सरकारच्या युवा वेव्हार आनी खेळां मंत्रालयाच्यो अवर सचीव मंजुळा जुनेजाय हजर आशिल्ली.
प्रतिनिधी मंडळाकडेन संवाद साधतना राज्यपाल पी. एस. श्रीधरन पिल्लई हांणी, समृद्ध संस्कृती, इतिहास आनी संवसाराक दिल्ल्या योगदाना खातीर भारताची लोकप्रियता वाडल्या. भारत देशांत हेर धर्माच्या लोकांक सदांच येवकार आसता, अशें तांणी सांगलें.
युवा देवाणघेवाण कार्यावळींक लागून आशियाई देशां वांगडा प्रादेशीक शांतीकाय, इश्टागत आनी अर्थीक भागीदारी विशीं भारताची वचनबद्धताय घटमूट जाता, अशेंय राज्यपालान म्हणलें.
खेळां मंत्री गोविंद गावडे हांणी, शिश्टमंडळाची ही भेट फुडारांत सहकार्य, सांस्कृतीक समज, नेतृत्व विकास आनी म्हत्वाच्या क्षेत्रांनी आंतरराष्ट्रीय सहकार्याक चालना दिवपाक म्हत्वाची थारतली अशें सांगलें. कला आनी संस्कृतीच्या दिवप घेवप उपक्रमांतल्यान मानवी विविधतायेत सोशीकसाण आनी समजीकायेक उर्बा मेळटा, अशेंय तांणी सांगलें.
शिश्टमंडळात कझाकस्तान, ताजिकिस्तान, किर्गिस्तान, उझबेकिस्तान, तुर्कमेनिस्तान ह्या देशांतल्या शंभर वांगड्यांचो आस्पाव आशिल्लो. मध्य आशियाई देश आनी भारतांतल्या तरणाट्यां मदीं अदीक परस्पर समजीकाय वाडोवप हो हे भेटीचो उद्देश आसा.
राज्यपालांचे सचीव एम. आर. एम. राव हांणी येवकाराच्या उलोवपांत राजभवनाच्या साबार उपक्रमांची म्हायती दिली.
ह्या वेळार दरेका देशाच्या प्रतिनिधीन तांचो अणभव आनी अपेक्षा सांगल्यो.
भारत सरकारच्या युवा वेव्हार आनी खेळां मंत्रालयाच्यो अवर सचीव मंजुळा जुनेजा हांणी उपकार मानले.
