आयज सकाळीं शिरगांवांचे देवी लयराईचे जात्रे वेळार जाल्ले खेटाखेटींत आतां मेरेन सात भक्तांक मरण आयलां. पन्नास परस चड भक्त जखमी जाल्यात. जखमीं मदीं धोंडाचोय आस्पाव आसा.
मेळिल्ले म्हायती प्रमाण, सुरवातेक होमखणा कडेन वतना दोग जाण जमनीर पडले. तेन्ना ही खेटाखेट जाली.
ह्या वेळार रस्त्या कुशीक आशिल्ल्या दुकानांचेर धोंड भक्त कोसळ्ळे. दुकानांक वीज पुरवण करपी विजेच्यो वायरी तुडिल्ल्यान कांय जाणांक शॉक लागिल्ल्याची शक्यताय आसा. कांय जाण कोयते आनी हेर अवजरे वस्तू विकपी दुकानांचेर पडून जखमी जाले. सकाळीं 3 वरांचे सुमाराक ही घडणूक घडली. जात्रेक सुमार 2 लाख लोक हाजीर आशिल्ले. पुलिसांनी सादूर रावून प्रकरण हाताळपा खातीर सगळे यत्न केले.
खेटाखेटीं उपरांत 30 जाणांक म्हापशेंच्या जिल्हो हॉस्पिटलांत व्हेले. तातूंतल्या 4 भक्तांक मरण आयलें. दिवचले हॉस्पिटलांत दोन भक्तांक मरण आयलें. जखमींक म्हापशें, दिवचले आनी जीएमसींत दाखल केल्यात. सध्या जींएमसींत 6 जाणांचेर उपचार चलतात. मुख्यमंत्री डॉ. प्रमोद सावंत हांणी दिवचले भलायकी केंद्राक भेट दिवन जखमींची विचारपूस. ते उपरांत म्हापशें जिल्हो हॉस्पिटलाक भेट दिली. तशेंच नीळकंठ हळर्णकार, आमदार डॉ. चंद्रकांत शेट्ये, आमदार प्रेमेंद्र शेट हांणीय हॉस्पिटलाक भेट दिली.
शिरगावचें जात्रेंत जाल्ले खेटाखेटींत 40 ते 50 भाविक जखमी जाल्ल्याची म्हायती मेळ्ळ्या. जाल्यार आतां मेरेन स भाविकांक मरण आयलें. सुर्या मयेकार,(सांखळे), आदित्य कवठणकार (17, अवचीतवाडो), तनुजा कवठणकार (52), यशवंत केरकार (40, माडेल, थीवे), प्रतिभा कळंगुटकार (कुंभारजुवे) आनी सागर नंदरगे,(माठवाडो, पिळगांव अशी मरण आयिल्ल्यांची नावां आसा.
सगळ्यो सरकारी कार्यावळी रद्द
मजगतीं, हे दुर्दैवी घडणुके उपरांत मुख्यमंत्री डॉ. प्रमोद सावंत हांणी फुडले तीन दिसां खातीर सगळ्यो सरकारी कार्यावळी स्थगीत करपाचे निर्देश दिल्यात.
