तृप्पुणीतुरा:
केरळ सरकाराचे संस्कृती खत्या खाला स्थापीत कोंकणी साहित्य अकेदमी केरळ संस्थेचे वतीन कोंकणी भाशा साक्षरता पद्धत सुरू जाली.
अकादमीन तृप्पुणीतुरा महात्मा ग्रंथशाला सभाघरांत आयोजीत केल्ले कार्यावळींत कोचीन महाविद्यालयाचे आदलें प्राचार्य डॉ.एन.अजीतकुमार हांणी साक्षरताय पद्दतीची उक्तावण केल्ली. अकादमीचे अध्यक्ष तंबानूर वी.गोविंद नायक हांणी यजमानपण चलयलें. वांगडी सचीव डी.डी.नवीनकुमार हांणी प्रास्ताविक भाषण केल्ले.
केरळांत कासारगोड थै तिरुवनंतपुरम मेरेनचे विंगविगड प्रदेशांत कोंकणी भाशा साक्षरताय पद्दतीचे खाला कार्यावळ्यो घडेवंन पुराय कोंकणी लोकां मदीं कोंकणी भाशे विशी साक्षरताय हाडपाक यत्न करतलें अशी वांगडी सचीव नवीनकुमार हांणी सांगलें.
तृपुणीतुरा श्रीराम देवस्थान वेवस्थापक मंडळाचे वांगडी अजीत एस.राव, जी.एस.बी.समाज अध्यक्ष पी.वी.हरी शेणै, महात्मा ग्रंथशालेचे सचीव डी.वी.दीपा हांणीं अनुग्रह भाषण केल्ले.
अकादमीचे वांगडी इ.एस.राकेष पै हांणी येवकार दिल्लो जाल्यार एकमेळी कार्यक्रमाचे वांगडी शोबा हरिदास हांणे उपकार मागलो.
