समाजांतले सांस्कृतीक आनी अध्यात्मीक घटक तिगोवन दवरपाक देवूळ समितींचें योगदान म्हत्वाचें थारतलें. नवीन देवूळ समितींनी देवळां वरवीं सांस्कृतीक आनी आध्यात्मिक पर्यटनाक चालना दिवची असो उलो मुख्यमंत्री डॉ. प्रमोद सावंत हांणी मारला.
देवूळ समितींची वेंचणूक काल आयतारा जाली. कांय आडवाद सोडल्यार चडशा देवूळ समितींच्यो वेंचणुको शांततायेन जाल्यो. नव्यान वेंचून आयिल्ले अध्यक्ष आनी वांगड्यांक डॉ. सावंत हांणी ट्विट करून परबीं दिलीं.
देवळाचें वेवस्थापन आनी तांच्या दिसपट्ट्या कामाची जतनाय घेवपाची जापसालदारकी देवूळ समितींचेर आसता. देवळाचें योग्य वेवस्थापन करपा वांगडाच देवळांत नितळसाण आनी भक्तांक योग्य त्यो सुविधा निर्माण करपाक जाय. समाजांत अध्यात्मीक आनी संस्कृतीक एकचार तिगोवन दवरपाक देवूळ समितींचें योगदान म्हत्वाचें थारतलें. देवळां संस्कृतीक केंद्रां म्हणून तयार करपाक जाय. देवळांचेर आदारिल्लें अध्यात्मीक पर्यटन वाडोवपा सयत आपलें गिरेस्त दायज पर्यटकां मेरेन पावोवपा खातीर वावुरचें अशें डॉ. सावंत हांणी म्हणलें.
