पणजी :
भाऊसायबांचो मगो पक्ष आनी आतांचो मगो वेगळो आसा. मगो पक्षांतल्यान जायते भोवजन फुडारी भायर पडले. काशिनाथ जल्मी, स. लवू मामलेदार, नरेश सावळ, बाबू आजगांवकार, दीपक पावसकार ह्या फुडार्यांनी मगो खातीर आपलें सर्वस्व ओंपिल्लें. तरी तांकां पक्ष सोडचो अशें कित्याक दिसलें, हाचो विचार जावपाक जाय. भाऊसायबांनी स्थापन केल्लो पक्ष हो गोंयच्या भोवजन समाजाचो, गांवांगांवांतले जनतेचो पक्ष आशिल्लो. सध्याचो पक्ष माधवरावांच्या गोठ्यांतलो पक्ष जाला, अशें कला आनी संस्कृती मंत्री गोविंद गावडे हांणी म्हणलें. सोमारा पणजे तांणी माध्यमां वांगडा संवाद सादलो.
सध्याचो मगो पक्ष हो फक्त एका कुटुंबा पुरतो मर्यादीत जाला. तो भाऊसायबांचो पक्ष उरूंक ना. आतांचो पक्ष भाऊसायबांचोच हें दाखोवन दिवपाचें आसल्यार जीत आरोलकार वा हेर भोवजन फुडार्याक अध्यक्ष करचो. भाजपाक सध्याच्या मगो वांगडा युती करपाची गरज ना. भाजपान आदेश दिल्यार फोंडें म्हालांतल्यो सगल्यो जापसालदारक्यो हांव स्वता स्विकारपाक तयार आसा, अशें मंत्री गावडे हांणी मुखार म्हणलें.
म्हज्या बापायन, हांवें पयलीं मगो पक्षा खातीर काम केल्लें. आतां जे कोण व्हडल्या तोंडान सांगतात ते आदीं कॉंग्रेसीचे एजंट म्हणून काम करताले. १९९९ वर्सा हेच लोक कॉंग्रेसीक मत दियात म्हणून प्रचार करताले. मगोच्या बैल आनी म्हशींनी म्हजेर टिका करचे पयलीं विचार करचो. कारण आयज जे उलयतात तांच्या राजकारणांतली श्रीगणेशा हांवें करून दिल्या. १९९९ वर्सा हांवें, विनोद नागेशकार, स. शिवदास वेरेंकार हांणी यत्न केल्ल्यानूच तांकां तिकीट मेळिल्ली. २०१२ सावनूच ह्या पक्षा वांगडा युती करची न्हय अशें म्हजें पक्कें मत आशिल्लें, अशें तांणी म्हणलें.
