राज्यपाल पुसापती अशोक गजपती राजू हांचे अभिभाशणान पांच दिसांच्या शिंयाळ्या अधिवेशनाची फाल्यां सोमार सावन सुरवात जातली. बर्च घडणुकेंत जाल्ल्या २५ जाणांच्या मरणाविशींचो उल्लेख अभिभाशणांत आसतलो काय? हे विशीं सगल्यांकूच उमळशीक आसा. अधिवेशन शुक्रार १६ जानेवारी मेरेन चलतलें.
फाल्यां पयल्या दिसा राज्यपालांच्या अभिभाशणा उपरांत मुख्यमंत्री डॉ. प्रमोद सावंत हे कामकाज सल्लागार समितीचे अहवाल सभाघराच्या पटलाचेर दवरतले. पयल्या दिसा फकत राज्यपालांचें अभिभाशण इतलेंच कामकाज आसा.
बर्च घडणुके सयत विंगड विंगड प्रकल्पावेल्यान राज्यांत आंदोलनां सुरू आसात. चिंबला युनिटी मॉला आड खर आंदोलन सुरू आसा. तुयां हॉस्पिटलाक लागून आंदोलन सुरू आसा. गोंयांत उत्तर भारतीयांक जमनी विकपाचे प्रकार वाडल्यात असो आरोप करून बरेच लोक आंदोलन करपाक लागल्यात. बर्च घडणूक आनी आंदोलनाक लागून अधिवेशन वादळी थारपाची चिन्नां आसात. देशाचें राष्ट्रीय गीत वंदे मातरमाचेर अधिवेशनांत चर्चा जातली. बर्च घडणुकेचेर चर्चेची मागणी विरोधी पक्षान केल्या आसली तरी हाचेर कामकाज सल्लागार समितीचे बसकेंत निर्णय जावंक ना. बर्च चर्चेच्या मुद्याचेर अधिवेशन तापतलें, अशे संकेत मेळटात.
