गोंयचे शेतकी मंत्री, आदले मुख्यमंत्री रवी सीताराम नायक (79) काल रातीं उसरां काळजाच्या आताकान भायर पडले. तांचे फाटल्यान घरकान्न, पूत रितेश, राॅय, सुनो असो परिवार आसा. तांची कूड खडपाबांध- फोंडेच्या तांच्या घरांत निमण्या दर्शना खातीर दवरल्या.
मंगळारा रातीं आताक आयिल्ल्यान तांकां फोंडेंच्या सावयकार हाॅस्पिटलांत उपचारा खातीर दाखल केल्ले. थंय दोतोरांनी तांकां मरण आयिल्ल्याचें जाहीर केलें
25 जानेवारी 1991 ते 18 मे 1993 मेरेन रवी नायक काँग्रेसीचे मुख्यमंत्री आशिल्ले. ताचे पयलीं ते महाराष्ट्रवादी गोमंतक पक्षांत आशिल्ले. उपरांत ते 2 एप्रील ते 8 एप्रील 1994 मेरेन स दीस मुख्यमंत्री आशिल्ले. लवू मामलेदार हांचे कडल्यान तांकां मदीं हार घेवची पडिल्ली. 1998 त ते काँग्रेसीचे खासदार आशिल्ले. 2000 ते 2002 मेरेन ते भाजपा सरकारांत ते उपमुख्यमंत्री आशिल्ले. ‘हांव 1967 सावन राजकारणांत आसां. गोंय विलिनीकरणा आड हांवें खूब काम केलां,’ अशें तांणी प्रुडंटाक दिल्ले मुलाखतींत सांगिल्लें.
रवी नायक सुरवातेच्या काळांत बार अॅण्ड रेस्टाॅरंट चलयताले. राष्ट्रीय पांवड्यार गोंयां वतीन हाॅलिबाॅल खेळपी ते एकसुरे आमदार. आदले आमदार चर्चील आलेमांव हांकां रवी मुख्यमंत्री आसतना बंदखणींत वच्चें पडिल्लें. गोंयांतल्या कांय गांवांनी चलपी गुंडगिरी, खंडणी घेवपी गुन्यांवकारांक तांणी धाक बसयिल्लो. तांच्या काळांत हे प्रकार बंद जाल्ले. हाचो गोंयकार अजून उगडास काडटात.
रवी नायक हांच्या मरणाचें दुख्ख जालां. मुख्यमंत्री, मंत्री ह्या नात्यान तांणी राज्याचें प्रशासन, गोंयकारां खातीर बरें काम केलां. ताची सगल्यांक कायम याद उरतली.’ अशें डाॅ. प्रमोद सावंत हांणी ट्विट केलां.
