पणजी :
सोळाव्या शेंकड्यांतलो नागरी कोंकणींतलो पयलो शिलालेख दिवचल तालुक्यांतल्या पिळगांवां सांपडलो. सोळाव्या शेंकड्यांतल्या श्रीकालभैरवाच्या मुर्तीच्या फाटले वटेन तीन ओळींचो शिलालेख आसा. सोळाव्या शेंकड्यांतलो नागरी कोंकणींतलो पयलो शिलालेख आशिल्ल्याचे इतिहास संशोधक आनी संत सोहिरोबानाथ आंबिये महाविद्यालयाचे प्राध्यापक डॉ. रोहित फळगांवकार हांणी सांगलें. ह्या शिलालेखाच्या सोदाक लागून गोंयांतल्या मूर्तींचेर संशोधन करपाची वाट मेकळी जाल्ल्याचे तांणी स्पश्ट केलां.
वरगांवच्या श्रीचामुंडेश्वरी देवळाच्या तळ्यांत ही मूर्त मेळ्ळी. ते उपरांत देवळाचो अध्यक्ष तुषार टोपले आनी देवळाच्या हेर अधिकाऱ्यांनी ताचे कडल्यान ही मुर्त मेळयली. देवळांत जाल्ले नवे मुर्तीचे प्रतिष्ठापने वेळार ह्या मुर्तीचे तळ्यांत विसर्जन केल्ले. ह्या शिलालेखांत नागरी कोंकणींत तीन ओळी आसात. पूण ताचेर आशिल्लीं उतरां स्पश्ट नाशिल्ल्यान वाचपाक कठीण जाता. पूण ह्या शिलालेखा विशीं चड संशोधन करप शक्या आशिल्ल्याचे फळगांवकार हांणी सांगलें.
श्रीकालभैरवाची जी मुर्ती मेळ्ळ्या ताचे फाटल्या तीन ओळींनी ‘गोंयें सिंहासमी, गोंए आनी गोंयांत चंडिका’ हीं उतरां आसात. हीं उतरां कोंकणी भाशे कडेन संबंदीत आसात. ‘फाल्गुन’ शब्दय कोंकणीक लागीं आसा अशें डॉ. फळगांवकार हांणी स्पश्ट सांगलें. भारतीय पुराभिलेख सर्वेक्षण खात्यान हे गजालीची पुश्टी केल्या. खात्याच्या अॅप्रीग्राफिस्टान हांणी हो लेख वाचून कोंकणी आशिल्ल्याचे स्पश्ट सांगलें.
गोंयांत आतां मेरेन मेळिल्ल्या शिलालेखांत ‘गोवे, गोपक’ अशें शब्द दिसल्यात. पूण गोंयांतल्या दिवचल तालुक्यांतल्या पिळगांवांत मेळिल्लो पयलो ज्ञात कोंकणी शिलालेख आसा. मेळिल्ली ही मुर्ती 1579 त तयार केल्ली आनी 1583 त स्थापन केल्ली आसूंक जाय असो अदमास इतिहास संशोधक डॉ. रोहित फळगांवकार हांणी काडलो.
