भंडारी समाजांतलो वाद दिसानदीस वाडत आसा. ह्या वादाचे परिणाम आयज पाजीफोंड-मडगांव हांगा जाल्ले सार्वत्रिक सभेंत उक्ते जाले. हाजीर आशिल्ल्या तरणाट्यांनी सोसायटीचे अध्यक्ष अशोक नायक हांचेर प्रस्नांचेर भडिमार केलो.
तांकां समाधानकारक जाप दिवंक मेळ्ळी ना. निमाणे नायक हेर वांगड्या सयत बसकेंतल्यान अर्द्या वाटेर भायर सरले. हाका लागून सार्वत्रिक सभेंत व्हड गोंदळ निर्माण जालो.
शुक्रारा समाज फुडारी उपेंद्र गावकार हांणी पणजीतांत पत्रकार परिशद घेतली आनी सद्याचे समितीचेर वेगवेगळे आरोप केले. सोसायटीचे अध्यक्ष अशोक नायक हांणीय सोशल मिडिया वरवीं गावकाराच्या आरोपांचेर टिका केली.
उपेंद्र गावकारान म्हणलें ‘भांडारी समाज समिती बेकायदेशीर आसा. देखून नामनेच्या भावांनी हे भौशीक बसकेक हाजीर रावचें न्हय अशें आवाहन पत्रकार परिशदेंत केलें. अशें आसून लेगीत आयतारा जाल्ले सार्वत्रिक बसकेक सुमार 200 लोक हाजीर आशिल्ले. ह्या हाजीरीच्या उणावाक लागून हेर वांगडीय नाराज जाले.
सार्वत्रिक बसकेंत जायते प्रस्न उप्रासले. सगळ्यांत म्हत्वाचो मुद्दो म्हळ्यार अध्यक्षाची वेंचणूक. अशोक नायक हांकां ऑनलायन मुजत वाडोवपाक अध्यक्षाक कसो दिलो, संविधानांत असो उल्लेख नासतना असो निर्णय कित्याक घेतलो असो प्रस्न विचारला.
नायकान हाका समाधानकारक जाप दिली ना. तेखातीर हामरितुमरीची भास वांगड्यामदींय तयार जाली. वाद वाडत आसा हें कळटकच नायक अर्द्या वाटेर बसकेंतल्यान भायर सरलो.
