कोंकणी भाशा मंडळ, गोंयान कोंकणींत एम. ए. करपी पयल्या वर्साच्या 5 विद्यार्थ्यां खातीर शिश्यवृत्त्यो जाहीर केल्यात. ह्यो शिश्यवृत्त्यो दरेकी 10 हजार रुपयांच्यो आसतल्यो. शिश्यवृत्त्यो अश्यो आसात – भौ. माणिकराव गावणेकार हांणी आपले बायलेच्या उगडासान दवरिल्ली स. पद्मजा माणिकराव गावणेकार स्मृती कोंकणी शिश्यवृत्ती, डॉ. जयंती नामदेव नायक हांणी आपल्या व्हडल्या भावाच्या उगडासान दवरिल्ली स. पंढरीनाथ नामदेव नायक स्मृती कोंकणी शिश्यवृत्ती, भौ. ज्योकीम कुर्रेय आफोंसो हांणी आपल्या बापायच्या उगडासान दवरिल्ली स. पेद्रु कुर्रेय आफोंसो स्मृती कोंकणी शिश्यवृत्ती, भौ. सुहास पै आंगले हांणी दवरिल्ली कोंकणी शिश्यवृत्ती तशेंच भौ. कामिनी कुंडयकार हांणी सर्गेस्त शिवराम शेणवी कुंडयकार हांच्या उगडासान दवरिल्ली कोंकणी शिश्यवृत्ती.
इत्सूक विद्यार्थ्यांनी अर्ज आनी हेर कागदपत्रां मंडळाच्या konkanibhashamandal.goa@gmail.com ह्या ई-मेल नाम्याचेर वा कोंकणी भाशा मंडळ, शंकर भांडारी मार्ग, विद्यानगर, मडगांव गोंय, 403601 ह्या नाम्याचेर 13 फेब्रुवारी 2025 मेरेन धाडून दिवचें.
शिश्यवृत्त्यां खातीर हे नेम लागू जातले – शिश्यवृत्ती मेळोवपी विद्यार्थ्यांक मंडळ एका वर्साच्या कार्यकाळा खातीर कोंकणी भाशे कडेन संबंदीत एक प्रकल्प दितले. तो तांणी एकठांय पुराय करचो पडटलो. अर्जदार गोंयचो रहिवासी आसचो पडटलो, अर्जदार गोंयांतले मान्यताय प्राप्त संस्थेंत एम. ए. कोंकणीच्या पयल्या भागांत (पयलें वर्स) शिक्षण घेवपी आसूंक जाय, अर्जदाराची कुटुंबाची येणावळ वर्साक 3,50,000/- रुपया परस चड आसूंक फावना, इत्सूक विद्यार्थ्यांनी शिश्यवृत्तीची गरज मांडपी अर्जीपत्र सादर करूंक जाय, अर्जदारांनी आपलें शिक्षणीक आनी फुडाराचें ध्येय, कोंकणी भास आनी संस्कृताये कडेन आशिल्ली तांची वचनबद्धताय, शिश्यवृत्तीचो तांकां कसो फायदो जातलो हाची माहिती दिवपी संक्षिप्त निबंद वा वैयक्तीक विधान सादर करचें पडटलें.
अर्जदारान आधार कार्डाची स्वयं-प्रमाणीत प्रत, येणावळ प्रमाणपत्र, जल्म दाखल्याची स्वयं-प्रमाणीत प्रत (वर्सा भितरली प्रत), गुणपत्रिकांच्यो स्वयं-प्रमाणीत प्रती (धावी, बारावी आनी पदवी), एम.ए. पयल्या वर्सा फारीक केल्ल्या शुल्काची प्रमाणीत प्रत, विद्यार्थ्याच्या बँक खात्याची प्रत, हॉस्टेल प्रमाणपत्र (लागू आसल्यार), पासपोर्ट आकाराचो फोटो, अर्जदारान स्वता बरयल्लो निबंद वा वैयक्तीक विधान मंडळाक दिवचें पडटलें. शिश्यवृत्त्यो भेटोवंक मंडळान थारायल्ले निवड प्रक्रिये प्रमाणें विद्यार्थ्यांची निवड जातली. अर्ज स्विकारपाचो वा न्हयकारपाचो अधिकार मंडळा कडेन आसतलो. 21 फेब्रुवारीक जावपी खास कार्यावळींत ह्यो शिश्यवृत्त्यो भेटयतले.
