फोंडा (प्रतिनिधी)
काळीज जितलें नितळ निवळ तितलें सृजन आनी सादरीकरण प्रभावी पुश्टीक जाता अशें नामनेचे क्रिकेटर आनी युको बॅंकेचे आदले व्यवस्थापक उल्हास म्हार्दोळकार हांणी सांगलें. मुकेश थळी हांच्या साहित्यात अंतर्मुख जावपाक जाता, हो सिध्दहस्त लेखक वाचप्यांक एक सुंदर ल्हवपीक भोंवडी घडयता अशें सांगतना थळी हांच्या निबंद विशयांची विविधता अजापीत करपी आसा अशेंय तांणी सांगलें.
मुकेश थळी हांकां साहित्य अकादेमी पुरस्कार फाव जाला म्हणून मित्रमंडळान केरीच्या ट्रॉपिकल स्पायस प्लांटेशनात स्नेहसुवाळो आयोजित केल्लो तातूंत ते उलयताले. पक्व पिरायेचेर थळी हांची सृजन गाडी देंवतेक लागल्या आनी ब्रेक नाशिल्ली ही आकांताची गती आशिल्ल्यान थळी हांच्या लेखणेंतल्यान नवनिर्मिती जायत रावतली आमी फक्त वाचनानंद घेवया अशें तांणी म्हळें. चंदनाच्या रूखा भोंवतणच्या झाडांक चंदनाचो वास येता तशें मुकेशबाबांच्या साहित्याच्या गोपांत रावता ताकाय एक निर्गुण, निराकार सत्य आयामांचो परमळ येवपाक लागता कारण त्या बरपाक आध्यात्मिकतेची एक ठांयबसका आसा अशें म्हार्दोळकार हांणी सांगलें.
कवी उदय म्हांबरो हांणी आपल्या प्रास्ताविक उलोवपांत थळी हांच्या उपाट साहित्याची मेजणी करपाक मापटींच उणीं पडटात अशें सांगलें. उल्हास म्हार्दोळकार हांचे हस्तुकीं थळी हांचो मानपत्र, शाल, श्रीफळ देऊन भोवमान केलो. सुभाष जाण हांणी थळी हांणी तिनूय भाशांत संख्यात्मक आनी गुणात्मक रचना सातत्यान करून एक विक्रमी देख घाल्या अशें सांगलें. कलाकार रघुनाथ साकोर्डेकर हांणी मुकेशबाबाच्या नकेत्रां या कवितांचें अभिवाचन केलें. स्नेहा वेरेकर-मुरकुटे हांचेंय उलोवप केलें. उद्येजक संदीप सतरकार हेवेळार हाजीर आशिल्ले.
