पणजी :
हॉलीवूड अभिनेतो आनी निर्मातो मायकल डग्लस हांकां फुडल्या म्हयन्यांत गोंयांत जावपी 54 व्या आंतरराष्ट्रीय चित्रपट महोत्सवांत (IFFI) ‘सत्यजीत रे जिणेंगौरव पुरस्कार’ भेटोवन भोवमान करतलें अशी म्हायती केंद्रीय म्हायती आनी प्रसारण मंत्री अनुराग ठाकुर हांणी दिली.
मायकल कर्क डग्लस हो अमेरिकन अभिनेतो आनी चित्रपट निर्मातो. ताका दोन ऑस्कर, पांच गोल्डन ग्लोब, एक प्राइम टायम एमी, सेसिल बी. डीमिल आनी एएफआय जीवनगौरव अशे जायते पुरस्कार मेळ्ळ्यात.
सुरवेक ताणें चित्रपट, माचयेर आनी टेलिव्हिजनचेर काम केलां. ‘द स्ट्रीट्स ऑफ सॅन फ्रान्सिस्को’ हे दूरचित्रवाणी मालिकेंत ताणें पयलेच खेपे काम केल्लें. जाचे खातीर तांका सेगीत तीन एमी पुरस्कार नामांकनां मेळ्ळीं. 1975 वर्सा डग्लसान आपल्या बापायचे कादंबरीचेर आदारून ‘वन फ्लू ओव्हर द कुकूज नेस्ट’ हो चित्रपट तयार केलो. ह्या चित्रपटा खातीर डग्लसाक पयलो ऑस्कर मेळ्ळो.
डग्लस हांचो ‘द चायना सिंड्रोम’ (1979), रोमांसिंग द स्टोन (1984), द ज्वेल ऑफ द नाईल, ए कोरस लायन (1985), अॅट्रॅक्शन (1987), वॉल स्ट्रीट (1987), ब्लॅक रेन (1989) हे सिनेमा लोकप्रीय आसात.
