Govind Gaude : अंदूं गोंयांत जावपी 37व्या राष्ट्रीय खेळांची पळोवणी करपा खातीर भारतीय ऑलिंपिक संघटनेचें शिश्टमंडळ 6 ते 11 मार्च मेरेन राज्यांत भेट दितले अशें खेळां मंत्री गोविंद गावडे हांणी बिरेस्तारा सांगलें. दिवाळे पयलीं ही सर्त जावपाची येवजण आसा असोय उल्लेख तांणी केला.
गोंय ऑलिंपिक असोसिएशनाच्या अधिकाऱ्यांनी बिरेस्तारा पर्वरी हांगा खेळां मंत्री गावडेक मेळून सर्त आयोजीत करपा विशीं चर्चा केली. ऑक्टोबर वा नोव्हेंबरांत ही सर्त जातली अशी म्हायती खेळां मंत्र्यान गोंयच्या शिश्टमंडळाक दिली.
आयओए आनी केंद्र सरकारा कडेन चर्चा करून सर्तीची नेमकी तारीख थारायतले असोय उल्लेख तांणी केला. तशेंच खेळगड्यांक पुराय आदार दिवपाचें आनी तशेंच राष्ट्रीय सर्तींत गोंयचें बरे कामगिरी खातीर सर्ती पयलीं गरजेच्यो सगळ्यो सुविधा तयार करपाचें उतर खेळां मंत्र्यान दिलें.
राष्ट्रीय खेळां सर्तीचें येसस्वी आयोजन करपा खातीर तालुका आनी गांव पांवड्यावेल्या क्लबां वांगडा राज्य पांवड्यावेल्या खेळां संघटनांचो आस्पाव करपाचो दावो खेळां मंत्री गावडे हांणी केला.
गोंय खेळां प्राधिकरणाचे कार्यकारी संचालक गीता नागवेकर, प्राधिकरणाचे सहाय्यक संचालक नवीन आचार्य, गोंयचे सचीव गुरू दत्त भक्त, अधिकारी अरवीन सुवरीस, राजू मंगेशकर, जयश नायक, सिद्धार्थ सतरडेकर, निशा मडगांवकार, संदीप हेबले हाजीर आशिल्ले.
