आमदार कार्लुस फेरेरा हांणी प्रस्न जापेच्या काळांत कला अकादमीच्या विशयाचेर प्रस्न हाजीर केलो. हे विशीं जाप दितना मुख्यमंत्री डॉ. प्रमोद सावंत हांणी कला अकादमीच्या नुतनीकरणाचेर आतां मेरेन ४२ कोटी रुपया फारीक केल्यात. चार्ल्स कुरैया फावंडेशना कडल्यान येवपी सुचवण्यांचो निश्चीत विचार करतले. तशेंच कला अकादमी विशीं कलाकारांचीय समिती स्थापन करतले, अशी हमी तांणी मंगळारा विधानसभा सभाघरांत दिली.
कला अकादमीच्या इमारतीच्या नुतनीकरणाचें काम बांदकाम खात्याच्या (पीडब्ल्यूडी) अभियंत्यां वरवीं केलें. नुतनीकरण पुराय जाले उपरांत इमारत कला आनी संस्कृती खात्या कडेन हस्तांतरीत केली. मात, ताचे उपरांत उक्त्या सभाघराचें पांखें कोसळपा वांगडा कांय भागांनी उदकाची गळटी सुरू जाली. दीनानाथ मंगेशकर सभाघरांतली सावंड सिस्टम सारकी नाशिल्ल्याचें लक्षांत आयलें. हाचेर कशे तरेन तोडगो काडटले, असो प्रस्न आमदार फेरेरा हांणी विचारिल्लो.
मुख्यमंत्र्यानी उलयतना सांगलें, कला अकादमीची इमारत १९८० त बांदिल्ली. उपरांत २००३ त दुरुस्ती केल्ली. २०२० त आयआयटी हैदराबादान इमारतीची पळोवणी करून अहवाल सादर केल्लो. चार्ल्स कुरैया फावंडेशनानूय इमारतीची पळोवणी केल्ली. ह्या दोनूय संस्थांनी इमारत मोडपाची सोडून तिचें नुतनीकरण करपाचो सल्लो दिल्लो. ते प्रमाण कला अकादमीचे इमारतीचें नुतनीकरण केलें.
ह्यान पयलीं जून ते ऑगस्ट ह्या तीन म्हयन्यांत कला अकादमींत पावसाचें उदक सांठून उरतालें. ताका लागून कार्यावळी आयोजीत करपाक आडमेळीं येतालीं. मात आतां नुतनीकरणा उपरांत उदक सांठून उरप बंद जालें. ताका लागून ह्या तिनूय म्हयन्यांत कला अकादमींत कार्यावळी आयोजीत करूं येतात. इमारतीच्या नुतनीकरणाचें कंत्राट दिल्ली कंपनीच फुडलीं पांच वर्सां हेर बारीक सारीक कामां पळयतलीं. तशेंच आयआयटी मुंबयची सल्लागार म्हणून नेमणूक केल्ली. आयआयटी मुंबयनूय सरकाराक काम पुराय जाले उपरांत अहवाल सादर केला, अशें तांणी सांगलें.
मजगतीं, विरोधी पक्ष फुडारी युरी आलेमाव हांणी कला अकादमीच्या कामा विशीं ‘पीडब्ल्यूडी’कडल्यान नुतनीकरण अहवाल घेवपाची मागणी केली. जाल्यार, आमदार व्हेंझी व्हिएगश हांणी सकयल्या दर्जाचें काम केल्ल्यां आड पुलिशेंत एफआयआर दाखल करपाची मागणी केली.
आमदार विजय सरदेसाय हांणी कला अकादमी विशीं सभाघर समितीची स्थापना करची अशी मागणी मुख्यमंत्री डॉ. सावंत हांचे कडेन केल्ली. मात, मुख्यमंत्र्यांनी ही मागणी भायर मारली. विरोधकांक विस्वासांत घेवन कलाकारांची समिती स्थापन करतले. तशेंच कला अकादमीच्या नुतनीकरण कामा विशीं स्थापन केल्ले तीन वांगड्यांचे समितीचो अहवाल आयले उपरांत फुडल्या अधिवेशनांत तो सभाघरांत सादर करतले अशेंय मुख्यमंत्री डॉ. सावंत हांणी सांगलें.
