म्हादय लवादाच्या निवाड्याक आव्हान दिवपी गोंय सरकाराची याचिका सर्वोच्च न्यायालयांत ५ ऑगस्टाक सुनावणेक येवपाची शक्यताय आसा. सर्वोच्च न्यायालयाच्या ५ ऑगस्टाक जावपी सुनावणेचे वळेरीचेर म्हादय याचिकेचो आस्पाव आसा. आमदार आलेक्स रेजिनाल्ड हांच्या लेखी प्रस्नाक उदका पुरवण खात्याचे मंत्री सुभाष शिरोडकार हांणी ही लेखी जाप दिल्या.
कर्नाटकाचे मुख्यमंत्री के. सिद्दरामय्या हांच्या फुडारपणा खाला शिश्टमंडळान ३० जून २०२४ दिसा प्रधानमंत्री नरेंद्र मोदी हांची भेट घेतली. कळसा प्रकल्पाक मान्यताय दिवपाची मागणी कर्नाटकाच्या शिश्टमंडळान केल्या. हाचे उपरांत म्हादय वाटावपा खातीर गोंय सरकारान किदें उपाय येवजण्यो केल्या, असो प्रस्न रेजिनाल्ड हांणी केल्लो. हाका श्री. शिरोडकार हांणी ही लेखी जाप दिल्या.
कळसा आनी भांडुरा प्रकल्पा खातीर कसल्याच तरेची कामां कर्नाटका कडल्यान सुरू ना. हाका लागून खासा उपाय येवजणेची गरज ना, अशें लेखी जापेंत म्हणलां. कणकुंबी कर्नाटका कडल्यान सुरू आशिल्लें कानालाचें काम आडावपाक सरकार कितें करता? असोय प्रस्न तांणी केल्लो. कसलींच कामां सुरू नाशिल्ल्यान खासा उपाय येवजण्यांची गरज ना, अशी जाप मंत्र्यांनी दिल्या.
म्हादयचें उदक घुवडावपा खातीर कर्नाटकाचे जे यत्न सुरू आसा, ताचेर गोंय सरकारान कर्नाटका आड दोन अवमान याचिका घाल्या. ह्यो सगळ्यो याचिका ५ ऑगस्ट सावन सुरू जावपी सुनावणेचे वळेरेंत आसा. म्हादय लवादा आडूय गोंयान कर्नाटका आड याचिका दाखल केल्या.
म्हादय संबंदी गोंयचे हेत जपपा खातीर केंद्रीय ङ्गुडार्यांची भेट घेवपाचो सध्या तरी प्रस्ताव ना. केंद्रीय मंत्री वा केंद्रीय फुडार्यांची भेट घेवपाचो सरकाराचो प्रस्ताव आसा काय? ह्या प्रस्नाचेर उदका पुरवण मंत्र्यांनी ही जाप दिल्या.
