रेल्वे मंत्रालयान आतां काणकोण स्टेशनाचेर नेत्रावती एक्सप्रेस आनी गांधीधाम एक्सप्रेस गाडयो थांबवपाक मान्यताय दिल्या. थळाव्या लोकां कडल्यान हाची मागणी आशिल्ली.
नेत्रवती एक्सप्रेस ही गाडी मुंबय ते तिरुवनंतपुरम (केरल) ह्या दोन स्टेशनांमदीं वता. गांधीधाम एक्सप्रेस कच्छ, गुजरातांतल्या गांधीधाम आनी तमिळनाडूंतल्या नागेरकोयल हांचेमदीं चलता.
नेत्रावती एक्सप्रेस 2 एप्रील सावन काणकोण रेल्वे स्टेशनाचेर आनी 8 एप्रील सावन गांधीधाम एक्सप्रेस थांबतली. हे संबंदी रेल्वे मंडळाचे संयुक्त संचालक विवेक कुमार सिन्हान आदेश जारी केला.
पूण काणकोण रेल्वे स्टेशनाचेर रेल्वे तिकेट वापरपाचेर नियंत्रण दवरून पांच म्हयन्यां उपरांत रेल्वे मंडळाक अहवाल दिवपाची सुचोवणी रेल्वे अधिकाऱ्यांक दिल्या. काणकोणच्या ज्येश्ठ नागरिकांनी आनी समान विचारांच्या नागरिकांनी फाटल्या वर्सा सावन ही गाडी थांबवपा खातीर निवेदन दिल्लें.
तेच प्रमाण आंदोलन सुरू जाले. फाटल्या म्हयन्यांत गोंय विधानसभेचे अध्यक्ष रमेश तवडकार नगराध्यक्ष रमाकांत नायक-गांवकार आनी शंभा नायक-देसाय हांचे वांगडा दिल्लीक गेले आनी रेल्वे मंत्री अश्विनी वैष्णवाक मेळ्ळे.
त्या वेळार रेल्वे मंत्र्यान सभापतीक काणकोण स्टेशनाचेर गाडी थांबवपाची आश्वासन दिल्लें. तें उतर आतां पुराय जालां.
