पणजी:
ग्रामपंचायत सचीव आनी कर्मचाऱ्यांनी हाजीरी खातीर लायिल्ल्या बायोमेट्रीक पद्दतीचो गैरवापर केला. ते खातीर तांचेर नदर दवरपा खातीर येत्या जानेवारी मेरेन एआय आदारीत चेहऱ्याची वळख प्रणाली सगळ्या पंचायतींनी स्थापन करतले अशईं म्हायती पंचायत मंत्री मॉविन गुदिन्हो हांणी बिरेस्तारा विधानसभेंत उलयतना दिली.
आमदार प्रेमेंद्र शेट हांणी हें विशीं प्रस्न विचारलो. हेर पंचायतींचो ताबो आशिल्ल्यान जायते पंचायत सचीव कार्यालयांत हाजीर रावनात, कांय कर्मचारी वेळार कामाक वचना, ताका लागून कामांत कळाव जाता आनी थळाव्या लोकांक ताचो परिणाम जाता. पंचायतींचें कामकाड सारकें जायना. ते खातीर पंचायत खात्यान बेगोबेग उपाय करचे अशी मागणी आमदार शेट हांणी केली. तांच्या प्रस्नाक जाप दितना मंत्री गुदिन्हो हांणी सांगलें, राज्यांतल्या सगल्या पंचायतींच्या सचीव आनी कर्मचाऱ्यांनी वेळार कामाक येवपा खातीर पंच आनी कर्मचाऱ्यां खातीर बायोमेट्रीक प्रणाली स्थापन केल्ली. कांय पंचायतींनी ही पद्दत चलता, जाल्यार कांय कडेन ती बंद आसा.
कांय पंचायतींच्या सचीव आनी कर्मचाऱ्यांनीच ही पद्दत इबाडायली. देखून तांचेर नदर दवरपा खातीर ‘एआय’ आदारीत चेहऱ्याची वळख प्रणाली स्थापन करतले. ही पद्दत इंटरनॅट नासतना लेगीत चलपाक शकतली. पंचायतींतल्या कर्मचाऱ्यांचो आंकडो, तांची हाजिरी आनी कामाचे भार आदीचेर हे प्रणाली वरवीं नियंत्रण दवरतले. देखून सचीव आनी कर्मचाऱ्यांक कसलेंय कारण दिवन कामाचेर गैरहाजीर रावंक मेळचें ना. पंचायतींचे कामकाज सुरळीत जावपाक हे पद्दतीचो फायदो जातलो असोय उल्लेख मंत्री गुदिन्हो हांणी केलो.
