पणजी : लेखक-संशोधक युगांक नायक हांणी बरयल्लें ‘देश राग’ हें कोंकणी नाटक, ‘वंदे मातरम्’ गीताच्या १५० वर्सांच्या स्मरणार्थ आयोजीत केल्ल्या संगीत नाटक अकादेमीच्या राष्ट्रीय नाट्य महोत्सवा खातीर वेंचून काडला. भारत सरकारची नृत्य, नाटक आनी संगीत ह्या मळावेली शिखर संस्था आशिल्ली नवी दिल्लीची संगीत नाटक अकादेमी, कालीदास जयंती निमतान १५ जुलै २०२६ दिसा देशभर हो महोत्सव आयोजीत करता. स्वातंत्र्य चळवळीच्या विशयांचेर आदारील्लीं देशभरांतलीं वेंचून काडिल्लीं नाटकां ह्या महोत्सवांत सादर जातलीं, तांत ‘देश राग’ नाटकाचोय आसपाव आसा.
कला अकादेमीच्या ५०व्या राज्य नाट्य स्पर्धेंत उत्कृष्ट संहितेचें इनाम मेळोवपी ‘देश राग’ नाटकाचे आतां मेरेन गोंयभर सात प्रयोग जाल्यात. १८ जून गोंय क्रांती दिसा निमतान रवींद्र भवन, सांखळी वतीन विद्यार्थ्यां खातीर ह्या नाटकाचो खाशेलो प्रयोग आयोजीत केल्लो. हें नाटक गोंयचे पयले हुतात्मे बाळा राय मापारी हांच्या जिविताचेर आनी १९५३-५५ ह्या स्वातंत्र्य चळवळीच्या काळाचेर आदारील्लें आसा.
ह्यो प्रयोग १५ जुलै दिसा सांजवेळा ६.३० वरांचेर कला अकादेमी, पणजी हांगा सादर जातलो. ह्या राष्ट्रीय नाट्य महोत्सवा खातीर गोंय सरकाराचे कला आनी संस्कृती संचालनालय थळावी आयोजक संस्था.
संगीत नाटक अकादेमीच्या मार्गदर्शक तत्त्वांप्रमाण, ह्या खाशेल्या प्रयोगा खातीर नाटकाची नव्यान निर्मिती परिक्रमा नॉलेज टर्मिनस ही संस्था करता. अकादेमीच्या नेमांप्रमाण सगळे कलाकार आनी तंत्रज्ञ ४० वर्सां सकयले आसप गरजेचे. ह्या निर्मितींत ७५ कलाकार आनी ३० तंत्रज्ञ आसात आनी सगळेच ४० पीराये सकयले आसात.
