पणजी : सभापती पदाचो राजिनामो दिले उपरांत काणकोणचे आमदार रमेश तवडकार आनी मडगांवचे आमदार दिगंबर कामत हांचो आसपाव मंत्रिमंडळांत जालो. आयज बिरेस्तारा राजभवनांत राज्यपाल पी. अशोक गजपती राजू हांचे हस्तुकीं दोगांनीय मंत्रीपद आनी गोपनीयतेचो सोपूत घेतलो. ह्या वेळार मुख्यमंत्री डॉ. प्रमोद सावंत आनी हेर मानेस्त हजर आशिल्ले.
सध्या आमदार तवडकार आनी आमदार कामत हांचो मंत्री मंडळांत आसपाव जाला. ह्यान फुडेंय आनीक कोणाकूय संद मेळपाक शकता, अशें म्हणीत डॉ. सावंत हांणी परत मंत्रीमंडळ बदल जावपाक शकतात, अशे संकेत सकाळींच दिल्यात.
आयचो सोपूत विधी हो राजकी फेरबदलाचो भाग म्हणून २०२७ चे विधानसभा वेंचणुकेचे फाटभूंयेर जाल्ल्याचें मानतात. मजगतीं, नव्या मंत्र्यांक खंयचें खातें मेळटलें हाचीय घोशणा बेगीनूच जावपाची शक्यताय आसा.
भाजपाचे 4 आमदार गैरहाजीर
दिगंबर कामत आनी रमेश तवडकार हांच्या सोपूत विधी सुवाळ्याक मायकल लोबो, दिलायला लोबो, बाबूश मोन्सेरात, आनी गोविंद गावडे हे आमदार गैरहाजीर आशिल्ले.
हांव एके कार्यावळीक लागून महाराष्ट्रांत गेल्लो. दनपरां गोंयांत पावलां. दिगंबर कामत आनी रमेश तवडकार हांकां परबी दिवपी संदेश हांवें धाडला. दोगांकूय हांव परबीं दितां, अशें आमदार मायकल लोबो हांणी सांगलें. शिवोले मतदारसंघांत एके कार्यावळीक लागून आमदार दिलायला लोबो सोपूत विधी हाजीर रावंक शकली ना, अशी म्हायतीय तांणी दिली.
इतले मजगती पणजेच्या महालक्ष्मी मंदीरात सत्यनारायण पूजा आशिल्ल्यान येणावळ मंत्री बाबूश मोन्सेरात हे लेगीत सोपुतविधी सुवाळ्याक हाजीर रावंक शकले ना.
