हांगाच्या दोना पावला दर्यादेगेचेर 26 ते 28 फेब्रुवारी मेरेन जाल्ल्या पयल्या ‘बीच स्प्रिंट नॅशनल रोविंग चॅम्पियनशिप गोंय 2026’ सर्तींत बायलांच्या विभागांत महाराष्ट्रान पद्मभूषण मनोहर पर्रीकार रोविंग ट्रॉफी जिखली.
तीन दिसांची ही सर्त भारतीय रोविंग फेडरेशनान, रोविंग आनी स्कुलिंग असोसिएशन ऑफ गोंयच्या सहकारान आनी गोंय खेळां प्राधिकरणाच्या आदारान आयोजीत केल्ली. हे सर्तींत देशभरांतल्या वेगवेगळ्या राज्यांतल्या खेळगड्यांनी वांटो घेतिल्लो.
पयल्या दिसा टाईम ट्रायल करून सर्त सुरू जाली. दुसर्या दिसा नॉकआउट आनी क्वार्टर फायनल फेरी जाला. जाल्यार निमाणे दिसा सेमी फायनल आनी फायनल जाली. दर्यादेगेवेल्या धांवपळ सर्तींत रेंवाचेर धांवप, उक्त्या दर्यांत ल्हान पूण चड तीव्रता आशिल्लो रोविंग कोर्स आनी निमाणी धांवप, खेळगड्यांची गती, सहनशक्ती आनी रणनिती चांचणी करप हांचो आस्पाव आशिल्लो.
इंडियन ऑलिंपिक असोसिएशनाचे कार्यकारी मंडळ वांगडी अमिताभ शर्मा आनी रोविंग फेडरेशन ऑफ इंडिया आनी गोवा स्पोर्ट्स अॅथॉरिटीचे अधिकारी ह्या कार्यावळीक हाजीर आशिल्ले. गोंयांतल्या उदका खेळां खातीर आनी दर्यादेगेवेल्या खेळां खातीर वाडत वचपी मुळावी बांदावळ आनी आदार हांचेर ह्या कार्यावळींत भर दिलो अशें अधिकाऱ्यांनी सांगलें.
