पालकांनी भुरग्यांक मागतां तें तें दिवंच्या बदला भुरग्यांक कितें जाय तें दिवंचे. ‘काळीज उसवलां’ हें बालमनाचेर संस्कार घडोवपी पुस्तक. ह्या पुस्तकाचे घराघरांत सामुहिक वाचन जावपाची गरज आसा अशें रविंद्र केळेकार विद्यालयाचे हेडमास्टर अनंत अग्नी हांणी सांगले.
नामनेचे कवी उदय म्हांबरो हांणी बरयल्ल्या ‘काळीज उसवलां’ ह्या पुस्तकाचेर ताच्या वाचप्यांकडल्यान तशेंच प्रथितयश साहित्यीक आनी प्राध्यापकां कडल्यान आयिल्ल्या आस्वादनात्मक प्रतिक्रिया आनी लेखांचेर आदारीत ‘काळीज उसवलां – म्हजे नदरेंतल्यान’ ह्या पुस्तकाच्या लोकार्पण सुवाळ्यांत ते मुखेल सोयरे ह्या नात्यान उलयताले.
नामनेचे समिक्षक काशिनाथ नायक हांणी संपादीत केल्ल्या ह्या पुस्ताकाचो लोकार्पण सुवाळो आर्ला, केरी हांगासर ट्रॉपिकल स्पायस प्लांटेशनांत मोठ्या दबाजान जालो. गोंयच्या कोंकणी साहित्यमळार एक आगळो वेगळो आनी पयलोच असो हो प्रयोग शेनवारा आर्ल केरी हांगा निसर्गरम्य वातावरणांत उजवाडाक आयलो. उपाट भरील्ल्या माटवांत साहित्य अकादेमी पुरस्कार प्राप्त लेखक उदय भेंब्रे, माधव बोरकार, डॉ. जयंती नायक, डॉ. प्रकाश पर्येंकार हांचेसयत पुस्तकांत आस्पावित आशिल्ले नामवंत लेखक, वाचक आनी रसिक हाजीर आसले.
सुवाळ्याचे अध्यक्ष म्हूण दिलीप बोरकार हांणी ह्या वेळार सांगलें कि “काळीज उसवलां आनी काळीज उसयलां हांतूत फरक आसा. योग्य वेळार काळजांतल्यो भावना उगत्यो करीना जाल्यार आरोग्याचेर परिणाम जाता आनी मागीर काळीज उसोवंचे पडटा.” मानाचे सोयरे भौ. दुर्गादास परब हांणी उदयाच्या ह्या पुस्तकाचे अणकार मल्ल्याळम, कन्नड आनी मराठी भाशेंत जाल्यात तशे सगळ्या भारतीय भासांनी जातले असो आशावाद परगटायलो. संपादक काशिनाथ नायक हांणी ‘काळीज उसवलां’ पुस्तकांतल्या मानवी मुल्यांचेर उजवाड घालो.
सुर्वेक दिनेश मणेरकार हांणी येवकार दिलो. उदय म्हांबरे हांणी उपकार मानले. कार्यावळीचे सुत्रसंचालन मानसी धाऊस्कार हांणी केले. संजना पब्लिकेशन्स आनी मित्रमंडळान हो सुवाळो घडोवन हाडिल्लो.
