पणजी:
गोंयांत 20 ते 28 नोव्हेंबर मजगतीं जावपी 55 व्या भारतीय आंतरराष्ट्रीय चित्रपट महोत्सवाच्या (इफ्फी) प्रतिनिधी नोंदणेक बरो प्रतिसाद मेळत आसा. ह्या वर्सा नोंदणी 4 ऑक्टोबर दिसा सुरू जाल्ली. 30 ऑक्टोबराचे अखेरेक 3235 जाणांची नोंदणी पुराय जाल्या. गोंय मनरिजवण संस्थेच्या (ईएसजी) अधिकाऱ्यांनी ही म्हायती दिली.
दर वर्सा इफ्फीची प्रतिनिधी नोंदणी सादारणपणान 8 ते 13 सप्टेंबर मजगतीं सुरू जाता. पूण अंदूं हाका कळाव जाल्लो. अशें आसलें तरी ह्या वर्सा इफ्फीक बरो प्रतिसाद मेळपाची शक्यताय आसा. मेळिल्ले म्हायती प्रमाण आतां मेरेन जाल्ल्या 3235 नोंदणी मदीं 1870 चित्रपट रसीक, 635 विद्यार्थी जाल्यार 730 चित्रपट मळार काम करपी वेवसायीक आसात. जाल्यार 209 माध्यम प्रतिनिधींची नोंदणी केल्या.
इफ्फीतल्या गोंय विभागाक बरो प्रतिसाद मेळत आसा. गोंयांतले दिग्दर्शक, निर्मार्त्यांक प्रोत्साहन दिवपा खातीर ईएसजी वतीन हो विभाग सुरू केला. ह्या विभागांत कोंकणी वा मराठी भाशेंतले फिचर चित्रपट तशेंच कोंकणी, मराठी, इंग्लीश वा हिंदी भाशेंतले बिगर फिचर सिनेमा वेंचतले. तशेंच ईएसजी वतीन इफ्फीची तयारी नेटान सुरू आसा. संस्थे वतीन विवीध कामां खातीर निविदा जारी केल्यात.
