गोंयच्या भलायकी मळार सराकारान 2186 कोटी रुपयांची तरतूद बजेटांत केल्या. तरी लेगीत गोंयच्या भलायकी केंद्रांनी दोतोर, भलायकी कर्मचारी, नर्सी आनी उपकरणांचो उणाव जाणवता. हो उणाव भरून काडपा खातीर ही तरतूद वाडोवपाची गरज आसा, असो सल्लो केपेंच आमदार अॅल्टन डिकॉस्टा हांणी दिलो.
किडनी संबंदीच्या दुयेंसाचीं खूबशीं प्रकरणां घडूंक लागल्यांत. केपें आनी काणकोण म्हालांत किडनी निकामी जाल्ल्या दुयेंसाचेर लक्ष दिवपाची गरज आसा. ते भायर इतले कोटींची तरतूद करून लेगीत जिएमसींतली फार्मासींत उदक भरता. वखदां पेड्डेर जावची न्हय म्हूण तांकां वखदां हांगा थंय व्हरची पडटात असो आरोप अॅल्टन डिकॉस्टा हांणी केलो.
केपें म्हालांतले 2-3 रस्ते घातक स्थितींत आसात. आवड्यां पयशे कमी मोडून रस्त्याचें काम चालू केलां. ते खातीर थंयसर पालसणां पडपाचो घात निर्माण जाला. दोनूय वटेन अतिरिक्त पयशे मोडून राखणे वणत बांदपाची गरज आसा, अशी मागणी अॅल्टन डिकॉस्टा हांणी केली.
नागरी पुरवण खात्यान ई सेवेंत सुदारणा करपाची गरज आसा. बारीक आनी गरीब मनीस सोसायटींतल्या रेशनाचेर निंबून आसा. ते खातीर तांकां बऱ्या दर्जाचे मनश्यांक खावपा सारखे रेशन दिवचें, अशी मागणी अॅल्टन डिकॉस्टा हांणी केली.
गोंयची सुमार 79 टक्के पंचायती स्वयंपूर्ण गोंय हे येवजणे खाला आयल्यात. पूण लोक धादोशी नात. विकसीत भारत यात्रा गोंयभर काडली. पूण खऱ्या मुद्यांचेर भर दिवंक ना, असो आरोप अॅल्टन डिकॉस्टा हांणी केलो.
