पणजी:
राज्यांतल्या एनिमेशन, व्हिज्युअल इफेक्ट्स, गेमींग आनी एक्सटेंडेड रियलिटी (एव्हीजीसी-एक्सआर) उद्देगांक चालना दिवपा खातीर एक म्हत्वाचें पावल उबारलां. गोंय एव्हीजीसी-एक्सआर असोसिएशन अधिकृतपणान स्थापन जाला. एव्हीजीसी-एक्सआर क्षेत्रांत नवनिर्मीती करून, गोंय हें सृजनशील उद्देगां खातीर मुखेल केंद्र म्हूण स्थापन करपा खातीर संघटना वावुरतली.
‘आतां आमी मुखेलपणान राज्याच्या एव्हीजीसी-एक्सआर धोरणाच्या मसुद्याचेर काम करतात आनी रोखडेंच संघटने वतीन हो मसुदो सरकाराक सादर करतले अशें तांणी सांगलें. हाचे वरवीं आमचें लक्ष राज्यांतल्या एव्हीजीसी-एक्सआर उत्पादनाक चालना दिवपाचेर आनी ह्या उद्देगा वरवीं राज्यांतल्या कला आनी मनरिजवण क्षेत्रांत व्हड प्रमाणांत योगदान दिवपाचेर आसतलें अशें संघटनेचे अध्यक्ष तपन आचार्य हांणी ह्या संदर्भार सांगलें.
अशें आसा संस्थापकीय कार्यकारी मंडळ
हे संस्थेचो अध्यक्ष म्हणून नामनेचो अभिनेतो आनी निर्मातो तपन आचार्य, पटकथा लेखक- दिग्दर्शक किशोर अर्जुन हाका उपाध्यक्ष, अभिनेतो आनी नामनेचो सुत्र-संचालक रोहित खांडेकर सचीव, व्हीएफएक्स संकलक विनय भट हांचो संयुक्त सचीव, आनी नामनेचो दिग्दर्शक जितेंद्र शिकरकार हाची भांडारी म्हूण नेमणूक जाल्या. तेच प्रमाण परेश नाईक, युगांक नायक, प्रद्युम्न नाईक, विनीत कुंडईकार, मकरंद तिळवे, मेघराज आकारकार हांचे वांगडा गोवा राज्यांतल्या गोवा आयटी म्हामंडळाच्या प्रतिनिधींची कार्यकारी समितींत नेमणूक केल्या.
फाटलीं तीन वर्सां आमी गोंय एव्हीजीसी-एक्सआर असोसिएशन स्थापन करपाचेर वावुरतात. गोंय, मुंबय आनी पुण्यांतय आमचीं जायतीं बसका जाल्लीं. नोव्हेंबर 2023 वर्सा आमी संयुक्तपणान गोंयच्या आयटी खात्याक मेळ्ळे, थंय संघटनेची येवजण मुद्रीत जाली. हे संस्थे वरवीं आमी आतां गोंय सरकारा वांगडा मेळून गोंयचें एव्हीजीसी-एक्सआर धोरण परतून सुरू करतले.
– आशीष कुलकर्णी,
गोंय एव्हीजीसी-एक्सआर असोसिएशनाचे सल्लागार,
FICCI एव्हीजीसी-एक्सआर मंचाचे अध्यक्ष.
