राजभास कायदो 1987 प्रमाण देवनागरी लिपींतली कोंकणी भास हीच राजभास आसा. हाका लागून रोमी कोंकणींतल्यान सरकारी वेव्हार जायना अशें मुख्यमंत्री डॉ. प्रमोद सावंत हांणी एका प्रस्नाच्या लेखी जापेंत स्पश्ट केलें.
रोमी कोकणी खातीर दाल्गाद कोंकणी अकादेमीक सरकार अनुदान दिता, अशेंय तांणी म्हणलें. राजभास कायदो 1987 मदीं दुरुस्ती करपाचो प्रस्ताव ना, अशी जाप प्रस्नाक दिल्या.
आमदार वेंझी व्हिएगश आनी क्रुज सिल्वा हांच्या तारांकीत प्रस्नाक राजभास खात्याचे मंत्री ह्या नात्यान मुख्यमंत्र्यांनी ही जाप दिली. रोमी लिपींतले कोंकणीक सरकार राजभास मानता? असो प्रस्न वेंझी व्हिएगश आनी क्रुज सिल्वा हांणी केल्लो.
गोंय सरकारान 1987 वर्सा राजभास कायदो संमत करून देवनागरी कोंकणीक राजभाशेचो दर्जो दिलो. देवनागरी लिपींतली कोंकणी ही राजभास आसा, असो कायद्यांत उल्लेख आसा. हाका लागून रोमी कोंकणीचो सरकारी कारभारांत उपेग जायना.
रोमी कोंकणींतल्या साहित्या सयत तियात्र, चित्रपट जातात, हाची सरकाराक म्हायती आसा. रोमी कोंकणीचे उदरगती खातीर सरकार दाल्गाद कोंकणी अकादेमीक दर वर्सा अनुदान दिता, अशें लेखी जापेंत म्हणलां. रोमी कोंकणीक राजभाशेचो दर्जो दिवचो, अशी मागणी खूबशे खेपे जाता. अधिवेशना पयलीं कांय पंचायतींच्या ग्रामसभांनी रोमी कोंकणीक राजभाशेचो दर्जो दिवपाचे मागणेचे थाराव संमत जाल्यात. हे फाटभुंयेर हे जापेक म्हत्व आयलां.
