कोंकणी भाशा मंडळ, गोंयची स. मनोहरराय सरदेसाय यादस्तीक ‘पेटूल’ ही बाल गितांची, बाल साहित्याची आनी शिक्षणीक साहित्याची कार्यावळ 14 फेब्रुवारीक मडगांवां रवींद्र भवनांतल्या पाय तियात्रिस्त सभाघरांत सांजेच्या 4.00 वरांचेर जातली. मंडळान निर्मणी केल्ल्या उमाणीं, निबंद- एक मार्गदर्शक सांगाती, भारताचीं आनी गोंयचीं प्रतीक चिन्नां ह्या बाल साहित्याच्या पुस्तकांचें तशेंच मज्जा मस्ती 1 ह्या पेन ड्रायवाचें लोकार्पण हे कार्यावळींत जातलें.
पेटूल कार्यावळीक फोमेंतो ग्रूप ऑफ कंपनीजचे चॅरमॅन भौ. अवधुत तिंबलो मुखेल सोयरे म्हणून हाजीर आसतले. जेश्ठ साहित्यीक आनी कोंकणी वावुरपी फा. मेन्युएल गोम्स, पुणेच्या कहानी किड्स लायब्ररीची संस्थापक भौ. गायत्री पटवर्धन, शिक्षण संचालनालयाची उप संचालक भौ. सिंधु प्रभुदेसाय, बुक्स दॅट स्किपाची संस्थापक भौ. आसावरी दोशी, तामनार ट्रान्समिशन प्रोजॅक्ट लिमिटेड
(गोंय) चे प्रकल्प संचालक भौ. देवानंद सिंग हे मानाचे सोयरे म्हणून कार्यावळीक उपस्थीत रावतले.
ह्या वेळार लिटल्स प्री प्रायमरी अॅण्ड प्रायमरी स्कूल- मडगांव, फातिमा कोन्वेन्ट हायस्कूल- मडगांव, रवीन्द्र केळेकार ज्ञानमंदीर- मडगांव, विद्याभुवन कोंकणी शाळा- मडगांव, विद्याभुवन पूर्व प्राथमीक शाळा- मडगांव, होली रोझरी कॉन्वेन्ट हायस्कूल- नुवें, भाटिकार मॉडेल प्राथमिक शाळा- मडगांव, मनोविकास इंग्लीश मिडीयम स्कूल- मडगांव, सचिका’स स्कूल ऑफ क्लासिकल डान्स ह्या संस्थांचे विद्यार्थी मज्जा मस्ती आनी शाणी मस्ती सिडींतल्या गितांचेर नाच सादर करतले.
मज्जा मस्ती तशेंच बाल साहित्य आनी शिक्षणीक साहित्य निर्मुपा खातीर मोलादीक हातभार लायिल्ल्या वेगळ्यावेगळ्या लेखक, कलाकार, अनुवादक, संगीतकार, गायक हांचो ह्या वेळार भोवमान जातलो.
मंडळान फाटल्या साबार वर्सांत विद्यार्थ्यां खातीर शाणी मस्ती 1 ते 7 ह्यो बाल गितांच्यो सिडी प्रकाशीत केल्यात. तशेंच 16 जानेरा आनी नमस्कार भारता ह्यो गोंयच्या मुक्ती चळवळीचेर आदारीत सिडी उजवाडायल्यात. माणकुल्यांचीं कवनां सिडी आनी पुस्तक रुपांत प्रकाशीत केल्यांत. त्या भायर, व्यक्तिचित्रणां, म्हायती पुस्तिका, सुविचार, रस्तोनाट्य, काणयांचीं पुस्तकां प्रकाशीत केल्यांत. हीं सगळीं प्रकाशनां पेटूल कार्यावळी वेळार प्रदर्शन आनी विक्री खातीर उपलब्ध आसतलीं.
