कोंकणी भाशा मंडळ, गोंयान संवसारीक मायभास दिसा निमतान अंदूंच्यान ‘भास-संवाद’ हे कार्यावळीचें आयोजन केलां. हे कार्यावळींत मंडळ नामनेच्या साहित्यकारां कडेन तरणाटे तशेंच शिक्षणीक क्षेत्रांतल्या वावुरप्यांचो एक खाशेलो संवाद घडोवन हाडटले.
दर वर्सा ही कार्यावळ संवसारीक मायभास दिसा म्हणल्यार 21 फेब्रुवारीक जातली. अंदूं हे कार्यावळींत मंडळ ज्ञानपीठ पुरस्कार प्राप्त नामनेचे भारतीय साहित्यकार दामोदर मावजो आनी सरस्वती सन्मान प्राप्त नामनेचे भारतीय साहित्यकार महाबळेश्वर सैल हांचे कडेन भास-संवाद घडोवन हाडटात. ही कार्यावळ 21 फेब्रुवारीक सकाळीं 9.30 वरांचेर रवींद्र भवन, मडगांवच्या कॉन्फरन्स सभाघरांत जातली. कार्यावळ दनपारां 12.30 वरां मेरेन चलतली. हे कार्यावळींत ह्या नामनेच्या साहित्यकारांक प्रस्न विचारपाची संद उपस्थितांक मेळटली.
हे कार्यावळीक गोंयांतल्या साबार महाविद्यालयांतले तशेंच गोंय विद्यापिठाचे विद्यार्थी उपस्थीत रावतले. तशेंच गोंयभरांतल्या वेगवेगळ्या शाळांचे शिक्षक हे कार्यावळीक उपस्थीत रावतले. मंडळान सगळ्या शाळांक हे कार्यावळीचें आपोवणें धाडलां. महाविद्यालयीन विद्यार्थी तशेंच शाळांच्या शिक्षकांनी हे कार्यावळीक मोटे संख्येन उपस्थीत रावचे असो उलो मंडळाची अध्यक्ष अन्वेषा सिंगबाळ हांणी मारला. ही कार्यावळ सगळ्यां खातीर उक्ती आसा.
अदीक म्हायती खातीर, ब्रिजेश शेट देसाय (9673453367) वा अभिजीत पागी (9545338713) हांचे कडेन संपर्क सादचो.
ह्या वेळार मंडळाच्या शिक्षणीक पुरस्कार तशेंच शिश्यवृत्तींची भेटवण जातली. अंदूं धावेचे परिक्षेंत कोंकणी विशयांत सगळ्यांत चड गूण फावो जाल्ले लॅकेंझिया फेर्नांडीस, धावेचे परिक्षेंत दक्षीण गोंयांत सगळ्यांत चड गूण फावो जाल्ले दृश्टी विनोद गांवस, निधी कपिल पै वैद्य, भुमी राजेंद्र गोसावी, डॅरील फिलीप ल्युक डिसोजा, पलिया दत्तप्रसाद सिनाय अग्नी, श्रेया परेश भट तशेंच बारावेचे परिक्षेंत सगळ्यांत चड गूण फावो जाल्ले दिया गौतम सावर्डेकार, नेहा संजीव सिनाय भांगी, रविना अर्जुन वेळीप, शर्वा चोडणकर आनी बी.ए. चे परिक्षेंत कोंकणी विशयांत सगळ्यांत चड गूण मेळयल्ले खातीर एन्ड्रिया साविया बाप्तिस्ता आनी एम.ए.चे परिक्षेंत कोंकणी विशयांत सगळ्यांत चड गूण मेळयल्ले खातीर काजल महेश नायक हांचो भोवमान जातलो.
तेच वांगडा शर्वरी शेट करमळकार, दिपांक्षा गांवकार, हार्दिक राणे, शुभांगी गांवकार, खुशी प्रभुदेसाय, प्रिया लवंदे आनी शर्वा चोडणकार हांकां स. पद्मजा माणिकराव गावणेकार शिक्षणीक शिश्यवृत्ती भेटयतले. कोंकणी अनुवादक आनी कार्यकर्ते माणिकराव गावणेकार हांणी ह्यो शिश्यवृत्ती पुरस्कृत केल्यात. ज्या भुरग्यांचें मुळावें शिक्षण (पयली ते चवथी) कोंकणींतल्यान जालां आनी जांणी पांचवी ते बारावी मेरेन कोंकणी विशय घेतला अशें गोंयच्या सगल्या वेवसायीक आनी हेर महाविद्यालयांत शिकपी विद्यार्थ्यांक ह्यो शिश्यवृत्ती भेटयतात.
