गौतम अदानी आनी हिंडेनबर्ग हांणी जाहीर केल्ल्या संशोधन अहवालाचेर फाटल्या दोन दिसां सावन भारतीय बाजारांत खूब चर्चा सुरू आसा. कारण ह्या संशोधन अहवालांत गौतम अदानी आनी ताच्या उद्देगीक गटाचेर गंभीर आरोप केल्यात. हाचो परिणाम म्हूण संवसारांतल्या गिरेस्त लोकांच्या वळेरेंत गौतम अदाणी सरळ चवथ्या क्रमांकाचेर पडला. इतलेंच न्हय, तर एका दिसांत तांचें बाजार भांडवल 80 हजार 078 कोटी रुपया मारून 18 लाख 37 हजार 978 कोटी मेरेन पावलां. म्हत्वाची गजाल म्हळ्यार अदानी उद्योग गटाचो एफपीओ 27 जानेवारीक बाजारांत बाजारांत हाडपाचो आसा आनी ताचे आदीं अदानीचे प्रतिमेक व्हडलो धपको बसला.
न्यूयॉर्कांतली हिंडेवबर्ग रिसर्च हे संशोधन संस्था बिरेस्तारा गौतम अदानी हांच्या कंपनींचेर गंभीर आरोप केले. अदानीच्यो कंपनी शेअर बाजारांत हस्तक्षेप करतात आनी फाटल्या कांय दशकांत अदानीन जायत्यो फटीच्यो येवजण्यो जाहीर केल्ल्याचो आरोप हिंडेनबर्गान केला. हाचो बरोच परिणाम बाजारांत दिसून आयला आनी एका दिसांत अदानी सुमार 80 हजार कोटींच्या बाजार भांडवलाचो धपको बसला.
ह्या अहवाला उपरांत एका दिसा भितर संवसारांतल्या गिरेस्त लोकांच्या वळेरेंत अदानीक ऍमेझॉनाचो संस्थापक जेफ बेजोस हाणें फाटीं घालो. हाचे आदीं अदानी तिसऱ्या क्रमांकाचेर आशिल्लो आनी ताची संपत्ती 119 अब्ज अमेरिकी डॉलर आशिल्ली. पूण 120 अब्ज डॉलर संपत्ती आशिल्लो बेजोस आतां तिसऱ्या क्रमांकाचेर आसा आनी अदानी चवथ्या क्रमांकाचेर देंवला. फाटल्या तीन वर्सांत अदानीची संपत्ती 819 टक्क्यांनी वाडल्या अशें म्हण्टात. फाटल्या तीन वर्सांत अदानीची संपत्ती सुमार शंबर अब्ज डॉलर वाडल्या.
मजगतीं, हिंदबनर्गान केल्ल्या ह्या सनसनाटी आरोपां उपरांत बाजारांत येवपी अदानीच्या एफपीओक व्हडलो धपको बसतलो असो अदमास आसा. 27 जानेवारी म्हळ्यार शुक्रारा अदानी एंटरप्रायझेस उक्त्या बाजारांत खरेदी करपा खातीर 20 हजार कोटी रुपयांचो एफपीओ सुरू करतली. भारतांतलो सगळ्यांत व्हडलो एफपीओ असो दावो करतात. पूण हिंडेनबर्गान हो आरोप दोन दीस आदीं केल्ल्यान ह्या एफपीओक त्रास जावं येता असो अदमास तज्ञांनी उक्तायला.
मजगतीं, एफपीओक लक्ष्य करून हे आरोप केल्यात असो दावो अदानी इंडस्ट्रीज गटान केला. “अदानी एंटरप्रायझेसाच्या एफपीओक लुकसाण करपाचो एकूच हेतू दवरून अदानी गटाची प्रतिमा कलंकीत करपाचो हो यत्न दिसता. पूण गुंतवणूकदारांनी सदांच अदानी उद्योग गटाचेर आपलो विस्वास दवरला”, अशें अदानी गटान जारी केल्ल्या निवेदनांत म्हणलां.
