आशावादी प्रकाशनान, दल्गादो कोंकणी अकाडेमी आनी कोंकणी अकाडेमी गोंय हाणीं मंगळरा (११ मार्च) रेजिनालड फेर्नांडीस सभासालांत, सकाळीं १०:३० थावन १२:०० पऱ्यांत चल्लेल्या पुस्तक लोकार्पण दबाजो काऱ्यांत कोंकणिच्या तीन लिपिचीं पांच पुस्तकां लोकार्पण जालीं.
बाब तोमाजीन कार्डोज (आधलो अध्यक्ष – दल्गादो कोंकणी अकाडेमी) हांच्या अध्यक्षपणाखाल, मुखेल सयरी जावना डो.बीना मार्टिन्स, बाब वसंत सावंत (अध्यक्ष, कोंकणी अकाडेमी गोंय), बाब सेल्सो फेर्नांडीस (अध्यक्ष, दल्गादो कोंकणी अकाडेमी), बाब विन्सी क्वाड्रस (आधलो अध्यक्ष, दल्गादो कोंकणी अकाडेमी), बाब फावुस्तो डिकोसता (संपादक, गुलाब), डो. प्रकाश पेऱ्यंकर (गोंय महाविध्यापीठ), बाब उदय म्हांबरो (नाम्नेचो कवी), बाब विल्ली गोयेस (नाम्नेचो कादंबरिकार), बाय उर्जिता भोबे (नाम्नेची कवी) अशें कन्नड, नागरी आनी रोमी लिपिंत बरंवचे साहिती, कवी ह्या काऱ्यांत हाजर आसले.
बाब सेल्सो फेर्नांडिसान येवकार उलवप कर्तच, सूत्र संचालन केल्ल्या बाब शैलेंद्र मेहतान सयऱ्यांची मोटवी ओळोक कर्तच, बाय उर्जिता भोबेन उडासाची काणीक दीवन येवकार दिवून ’फुलां तुरो’ पुस्तकाची ओळोक करून दिली. बाब उदय म्हांबरोन ’मोळसूद’ पुस्तकाची ओळोक करून दिली. बाब वसंत सावंतान ’सूऱ्या उदेला’ पुस्तकाची ओळोक करून दिली, बाब विल्ली गोयेसान (ग्वादलूप डायसा तर्फेन) ’भितरलो कवी’ पुस्तकाचो ओळोक करून दितच, बाब सेल्सो फेर्नांडिसाच्या हातीं पुस्तकां लोकार्पण जांवच्या हातीं हतांतर केलीं; डो.बीना मार्टिन्सान ’फुलां तुरो’, बाब विन्सी क्वाड्रोसान ’मोळसूद’, बाब तोमाजीन कार्डोनान ’सूऱ्या उदेला’ (रोमी लिपी), डो.प्रकाश पेऱ्यंकरान ’सूऱ्या उदेला’ (नागरी लिपी), बाब फावुस्तो वी डिकोसतान ’भितरलो कवी’ पुस्तकाचें लोकार्पण केलें. (हीं पुस्तकां आशावादी प्रकाशनाच्या २५व्या वर्सा कोंकणी सर्दार बसती वामन शेणय पुस्तक प्रकाशन येवजणेखाल प्रकाशीत जाल्लीं जावनासात)
सयऱ्यांनी; डो.बीना मार्टिन्स, डो.प्रकाश पेऱ्यंकर, बाब फावुस्तो डिकोसता हाणीं अपले संदेश दितच अधकक्ष उलवपांत बाब तोमाजीन कार्डोजान ’कोंकणी भासेच्या फुडाराक लागून आमी सर्वांनी लागीं येवन एका मनान कोंकणी वावर कर्ची गर्ज आसा आनी हो वावर असोच फुडें वेची गर्ज आसा’ म्हळें.
वल्ली क्वाड्रसान धिन्वास उलवपांत ’सूऱ्यो उदेला’ म्हजें तिस्रें राषट्र मट्टाचें कथासंकलन, पूण ह्या पुस्तकांत आसचो एक ऊण म्हळ्यार, हांतूं रोमी लिपिंत बरयिल्ली कथा ना. त्ये पास्त पाटल्या कांय वर्सां थावन अपणान जायती मिनत केली पूण अजून राषट्र मट्टाची कथा अपणाक लाभलिना. म्हणालो.
