sharad pawar : “देशाचें एकंदर चित्र पळयल्यार आयज केरळ, तमिळनाडूंत भाजपा ना.” फुडाराक वेंचून येवपाची शक्यताय ना. कर्नाटकांत पयलीं काँग्रेसीची सत्ता चलताली. पूण भाजपान थंय आमदार-खसदार मोडून सत्ता स्थापन केली. देखून येवपी वेंचणुकेंत मतदान करतना लोक हे विशीं नक्कीच विचार करतले. ते उपरांत दिल्ली आनी पंजाबांतय भाजपा ना. अस्तंत बंगाल आनी हिमाचलांतूय भाजपा ना. हाचे वयल्यान देशांत बदलाचें वारें व्हांवपाक लागलां हें स्पश्ट जाता”, अशें राकांपा अध्यक्ष खासदार शरद पवार हांणी स्पश्ट केलें. तो बारामतींत पत्रकारां कडेन उलयतालो.
मजगतीं, सर्वोच्च न्यायालयान आयतारा वेंचणूक आयुक्तांची नेमणूक करपा संबंदी म्हत्वाचो निर्णय दिलो. प्रधानमंत्री, विरोधी पक्ष फुडारी आनी सर्वोच्च न्यायालयाचे मुखेल न्यायाधीश आशिल्ले समितीचे शिफारशी प्रमाण मुखेल वेंचणूक आयुक्त आनी हेर वेंचणूक आयुक्तांची नेमणूक अध्यक्षान करची अशें सर्वोच्च न्यायालयान सांगलां. न्यायालयाच्या ह्या निर्णयाक चड करून सगळ्या राजकी पक्षांनी येवकार दिलो. मजगतीं, राकांपा अध्यक्ष शरद पवार हांणीय हे विशीं प्रतिक्रिया दिल्या.
‘वेंचणूक आयोगा संबंदीं कांय दुबाव राजकी पक्षांनी उक्तायले. ते उपरांत सर्वोच्च न्यायालयान ही प्रक्रिया बदलल्या. वेंचणूक आयुक्ताची नेमणूक करपाचे प्रक्रियेंत आतां प्रधानमंत्री, मुखेल न्यायाधीश आनी विरोधी पक्ष फुडारी आसतले. संसदीय लोकशायेच्या मळार हो एक बरोच बरो निर्णय आसा”, अशें शरद पवार हांणी सांगलें.
ह्या संदर्भार उलयतना तांणी हालींच तीन राज्यांनी जाल्ली वेंचणूक आनी पुण्यांत जाल्ले उपवेंचणुकेचेरूय टिप्पणी केली. “देशांत सरकार बदलपाक आतां मूड तयार जावपाक लागला.” तीन राज्यांची वेंचणूक, पुण्यांतली पोटवेंचणूक, कांय दिसां आदीं जाल्ली थळावी स्वशासनाची वेंचणूक, विधीमंडळाची वेंचणूक, ह्या वेंचणुकांचे निकाल सांगतात अशें तांणी सांगलें.
