bihar governer : राजेंद्र विश्वनाथ आर्लेकारान शुक्रारा बिहाराचो नवो राज्यपाल म्हूण सोपूत घेतलो. तो बिहाराचो 41वो राज्यपाल आसा. ताणें राज्यपाल पदाचो ताबो घेतला. दनपारां 12.30 वरांचेर राजभवनांत जाल्ल्या सुवाळ्यांत पाटणा उच्च न्यायालयाचे कार्यवाह मुखेल न्यायाधीश चक्रधारी शरण सिंगान तांकां पदाचो सोपूत आनी गुप्ततायेचो सोपूत दिलो.
ह्या वेळार बिहाराचे मुख्यमंत्री नीतीश कुमार, उपमुख्यमंत्री तेजस्वी यादव हांचे वांगडा हेर मंत्री विधानसभेचे अध्यक्ष, विधीमंडळाचे अध्यक्ष, विरोधी पक्ष फुडारी हाजीर आशिल्ले.
बिहाराचे नवे राज्यपाल राजेंद्र विश्वनाथ आर्लेकार शुक्रारा सकाळीं पाटणा विमानतळार पावले. मुख्यमंत्री नीतीश कुमार हांणी पाटणा विमानतळार तांकां येवकार दिलो. अर्लेकार बिहाराचो राज्यपाल म्हणून नेमणूक जावचे पयलीं हिमाचल प्रदेशाचो राज्यपाल आशिल्लो.
आयतारा तांचो हिमाचलांत निरोप सुवाळो जाल्लो. हाचे आदीं बिहाराचो राज्यपाल आशिल्ल्या फागू चौहानाक मेघालयाचो राज्यपाल केला. फागू चौहानान साडेतीन वर्सां बिहारांत रावले.
राजेंद्र विश्वनाथ आर्लेकार 2002 ते 2007 मेरेन आमदार आशिल्ले. तशेंच 2012 ते 2015 मेरेन गोंय विधानसभेचे अध्यक्ष आशिल्ले. ऑक्टोबर 2015 ते 2017 मेरेन गोंयच्या रान पर्यावरण मंत्र्याचो कारभार तांणी सांबाळ्ळो. तशेंच तो गोंयचो पंचायत राज्यमंत्री आशिल्लो. हाचे उपरांत ताका हिमाचल प्रदेशाचो राज्यपाल केलो.
