पणजी: कोंकणी भाशा मंडळ गोंयान साहित्य, बाल साहित्य, अणकार, युवा साहित्य पुरस्कार अशा वेगवेगळ्या पुरस्कारां खातीर पुस्तकां मागयल्यांत. अंदूं ३० सप्टेंबराक कोंकणी भाशा मंडळाक ६३ वर्सां पुराय जातात आनी त्या निमतान जावपी कार्यावळींत हे पुरस्कार जैतिवंतांक भेटयतले. हे पुरस्कार रॉक बारेटो साहित्य पुरस्कार, श्रीधर कामत साहित्य पुरस्कार, रमेश वेळुस्कार साहित्य पुरस्कार, डॉ. मनोहरराय सरदेसाय बालसाहित्य पुरस्कार, रामनाथ मणेरकार अणकार पुरस्कार, फा. मोरेन डिसौझा युवा साहित्य पुरस्कार हांच्या नांवान दवरल्यात.
१ जानेवारी २०२३ ते ३१ डिसेंबर २०२४ ह्या काळांत उजवाडाक आयिल्ली कथा, कविता, नाटक, तियात्र, कादंबरी, एकांकी, निबंद, संशोधन आनी अणकार ह्या प्रकारांतलीं पुस्तकां पुरस्कारा खातीर पात्र आसतलीं. रोमी आनी देवनागरी लिपयेंत बरयल्लीं कोंकणी पुस्तकां ह्या पुरस्कारांक पात्र आसात.
लेखक वा प्रकाशकान आपल्या पुस्तकांच्यो चार प्रती सचीव, कोंकणी भाशा मंडळ, कोंकणी भवन, शंकर भांडारी मार्ग, विद्यानगर, घोगळ, मडगांव, गोंय हांकां १० ऑगस्ट २०२५ मेरेन पावोवपाची मागणी सचीव मंगलदास भटान केल्या. साहित्य अकादेमी पुरस्कार मेळिल्ल्या पुस्तकांक तशेंच हेर राष्ट्रीय पुरस्कार मेळिल्ल्या पुस्तकांचो ह्या पुरस्कारां खातीर विचार जावचो ना. तशेंच, आदीं कोंकणी भाशा मंडळाचो त्याच प्रकारांत साहित्य पुरस्कार मेळिल्ल्या साहित्यकारांच्या पुस्तकांचो पुरस्कारा खातीर विचार जावचो ना अशें सचीव मंगलदास भट हांणें फुडें स्पश्ट केलां.
तेच परी फेलिस्यू कार्दोझ कोंकणी शिक्षक पुरस्कार (शालेय पांवड्यार) माधवी सरदेसाय शिक्षक पुरस्कार (उच्च माध्यमिक विद्यालय, म्हाविद्यालय, विद्यापीठ पांवड्यार) जुझे क्वाद्रूश कार्यकर्तो पुरस्कार, लिगोर फुर्तादो ट्रस्ट पत्रकरिता पुरस्कार, चंद्रकांत केणी स्तंभ लेखन पुरस्कार आनी कोंकणी भाशा मंडळ सेवा पुरस्कारा खातीर शिफारशी मागयल्यात. ह्या पुरस्कारां खातीर जांचें नांव सुचयतले तांणी तांची सविस्तर म्हायती वांगडाच धाडची अशीय मागणी सचिवान केल्या.
