बांगलादेशाची राजधानी ढाका हांगाच्या एका इमारतीत स्फोट जाल्ल्याची म्हायती मेळ्ळ्या. खबरां प्रमाण हे घडणुकेंत 11 जाणांक मरण आयलां आनी शंबरां परस चड जखमी जाल्यात.
मंगळारा ढाकाच्या व्यस्त बाजारांत हो स्फोट जाला अशें सांगतात. स्फोटाचें कारण अजून कळूंक ना. जखमीं मदल्या जायत्या जाणांची भलायकी गंभीर आसा. अशे परिस्थितींत मरण येवप्यांचो आंकडो वाडपाची शक्यताय आसा.
थळाव्या माध्यमांनी दिल्ले म्हायती प्रमाण पांच उजो पालोवपी इंजिनां थंय पावल्यात. आयज सांजवेळा 4.50 च्या सुमाराक हो स्फोट जालो अशें सांगतात. जखमींक ढाका मेडिकल कॉलेज हॉस्पिटलांत दाखल केल्यात. ही म्हायती पुलीस स्टेशन निरिक्षक बाचू मिया हांच्या संदर्भांत दिल्या.
चडशा जखमींचेर हॉस्पिटलाच्या आपत्कालीन विभागांत उपचार सुरू आसात अशें पुलीस अधिकाऱ्यान सांगलें. स्फोट जाल्ल्या इमारतीच्या तळमजल्यार सॅनिटरी उत्पाद विकपी जायतीं दुकानां आसात. ताचे कुशीक ब्रॅक बँकेचोय शाखा आसा. ह्या स्फोटाक लागून रस्त्या कुशीक उबी आशिल्ले बशीचेंय लुकसाण जाल्ल्याची म्हायती मेळ्ळ्या.
