– युगांक नायक
नामनेचे सिनेमा दिग्दर्शक महेश भट हाणीं एकदां अमिताभ बच्चन हांची कारकीर्द वर्णन करतना म्हणील्लें खंयच्याय अभिनेत्याच्या जिणेंत चार मौसम म्हळ्यार रूतू येतात. कलाकाराचो जल्म, उपरांत तो थिरावता, उंचाय गाठून तो ना सो जाता आनी लोकांच्या विस्मृतींत वता असो ताचो अंत जाता. चवथो पावंडो खेरीत कलाकारांच्या वाट्याक येता जें अमिताभ बच्चन हाणीं करून दाखलें. तें म्हळ्यार पुनरजल्म वा Comeback. गोंयचो प्रतिभावंत कलाकार, कोंकणी वेवसायीक रंगमंचयेचो जनक आनी कोंकणी नाटकाचो पयलो ‘Century King’, OG Rajdeep Naik आयज पीरायेची पन्नाशी हुपता. राजदीपाच्या जिवीताच्या ह्या Half Century’ त राजदीपान हे चारूय मौसम पळयल्यात.
जल्म / Star is born – महेश भट हांच्या आकलनां प्रमाण ह्या पावंड्यार कलाकार माचयेर जल्म घेता. राजदीपाच्या सुरावतेच्या जिणेंत वळवय फोंडचे भाटान रंगसांगाती संस्थीची नाटकां पळोवप, उपरांत कॉलेज फेस्टानी भाग घेवप, गांवा गांवानी एकांकीक करप. गोवा युवा महोत्सवाच्या आवांठात राजदीपाच्या कळाशेक वेगळीच कलाटणी गावता. विजयकुमार नायक हांच्या तालमींत तयार जाल्लो तरणाटो वेवसायीक रंगमंचयेर एन्ट्री करता. उपरांत, गांवच्या ताच्या सांगात्यांक घेवन कला चेतना, वळवय ही संस्था स्थापन करता.
स्थिरता / he is still there – पूर्ण वेळ नाटक करचे आदी राजदीप कितें करतालो? ल्हानपणांतल्यानूच राजदीप धडपडी व्यक्तीमत्व. राजदीप कॉलेजीत आसतना शेतांत वतालो, चवळ्यांची सॅंपलां घेवन तो शहरांतल्या होटेलानी भोवतालो. उपरांत राजहंस, अपुरबाय प्रकाशन ह्या प्रकाशन संस्थानी ताका वितरक म्हण कामाक दवरलो. ताणें बजाज चेतक स्कुटर घेतली. सुरवेक चवळ्यांची सॅंपला, उपरांत पुस्तकां, तो दोनय एकाच स्कुटरीचेर घेवन गोंयभर भोवतालो. गोंयभर भोवलो वळखी जाल्यो. शिक्षणीक वर्स सुरू जातना ताणें शाळांनी सायन्स जॉर्नाल वितरीत करापाचें काम घेतलें. हे सगळें करतना खेड्या पाड्यानी, गांवा-गांवानी उत्सव जातात, थंय नाटकांची गरज आसता, हें वळखलें. कला चेतना आता दर वर्सा नवें नाटक निर्मीत करपाक लागली. विस्तार वाडत गेलो. कला चेतना शंभरेक भुरग्यांक रोजगार दिवपी कंपनी जाली. तरीय, नाटकांच्या चिकीत्सकांक वेवसाय आसलो तरीय राजदीपाची नाटकां वेवसायीक दिसनाशील्ली. म्हणून ताका हीणावपाक ताणीं नवो शब्द काडलो, ‘निम्न-वेवसायीक’. राजदीपाची कला चेतना पर्जळी. जंय कोंकणी नाटकां जाय नाशिल्लीं थंय देखून कोंकणी नाटकान आपली हजेरी लायली. कला चेतना निर्मीत आनी राजदीप नायक प्रस्तूत ही बॅनर लायन गावांगावांनी पावली. राजदीपान कोंकणी रंगभूमीक नवी वळख दिलीच. पूण, दिली वेवसायीकता.
अंत / His time is gone – कांसुलो, मीक्सींग फीक्सींग आनी फीरंगी फटास ह्या तीनूय नाटकांतल्यान राजदीप लोकप्रीयता आनी अभिनयाचे जे तेंगशेर पावील्लो जंय आजून मेरेन खंयचोच गोंयचो कलाकार पावूंक नाशिल्लो. रादीपाचो प्रभाव इतलो आशिल्लो जो कोण माचयेर उबो रावता ताजे भितर राजदीपाचो थोडो तरी अंश दिसतालोच. Home Sweet Home ह्या सिनेमान राजदीपाक पड्यार हाडलो. उपरांत ह्या सिनेमाची फ्रेंचायज जाली जी गोंय आनी संवसारभर कोंकणी लोकां भीतर गाजली. उपरांत राजदीपान ‘कॅस्तांव दी कोफुसांव’ सिनेमाची निर्मीती केली. नामनेचे गीतकार गुलझार हाणीं सिनेमा दिग्दर्शन सोडटनां म्हटल्लें सिनेमा हे र्ट Commercial Art, जाचो हिशोब आपल्याक केन्ना समजलो ना. राजदीपाचो वेवसायीक अंदाज फसलो. दारांत चार-पांच टेंपो ट्रेव्हलर, रंगमांच्याची पुराय संसाधनां, आलिशान गाडयो. आतां मात राजदीपाची आर्थीक परिस्थीती बरीच खालावल्ली. कोंकणी रंगमंच्यावयलो पयलो सेंच्यूरी कींग, जो प्रतिभेच्या तेंगशेर आशिल्लो आयज तो तळाचो फातर जाल्लो. एक प्रतिवंत आनी रंगपटूची obituary बरोवपाची सुरूवात जाल्ली.
पुनरजल्म / Comeback – सिनेमा निर्मीतीत पूराय खाकनवाळ जावम पीरायेच्या ६० व्या वर्सा कौन बनेगा करोडपती मालीकेंतल्यान अमिताभ बच्चनाचो पुनरजल्म जालो. खेरीत कलाकारांच्या जिणेंत हो खीण येता. सर्वस्व वगडावन ह्या पावंड्यार राजदीप नव्यान रंगमंच्यार उभो जालो. शोशल मीडीयाचे आल्गोरीदम, नाटक-तीयात्राचो फॉर्म्युला हे सगळे स्थापीत सिध्दांत फोडून राजदीप रंगमंच्यार नव्या उर्मीन उबो रावता. नाटक आनी तियात्र हे फक्त दोन वेगळे नाट्य प्रकारूच न्हय तर दोन वेगळ्या समाजाच्यो अभिव्यक्ती. ते दोन वेगळे प्रेक्षक. जे कोणांक जमूंक ना तें राजदीपान करून दाखलें. आयज विदेशांत कोंकणी नाटकाचे टिकेटेड हावज-फूल्ल शो करपाचो पराक्रम राजदीपान करून दाखयलो. जे समिक्षक राजदीपाच्या वेवसायीक शौलीक ‘निम्न वेवसायीक’ म्हण हिणायताले ताणीं आयज गोंय भरच्या नाट्यघरांनी राजदीपाच्या नाटकांचे टिकेटेड शो जाता ते पळोवन आपलो अंदाज बदलापाचो वेळ आयला. आपल्या कलेंतल्यान हिन्दू आनी ख्रिस्तांव प्रेक्षकांचेर सामूहीक भूरळ घालपी एकमेव कलाकार आशिल्ले एम. बॉयर. ताचे उपरांत जर ह्या पंगतीक कोण बसता, तो राजदीप.
मेहनत, सातत्य आनी कळाशेच्या म्हाल्वजार निर्माण जाल्लो जागतीक स्थरा वयलो ‘Made in Goa Brand’, राजदीप नायक. मुखावयल्या काळांत ‘राजदीप नायक’ ही MBA शिकपी आनी शिकोवप्यां खातीर Case Study जातली. पीरायेच्या ह्या गोल्डन ज्युब्ली प्रयोगाची उपाट परबी आनी शुभेच्छा. जिवीताचो दर संघर्श आनी आव्हान आपल्या Maximum शक्तीन पेलपी ह्या Maximum कलाकाराक सलाम.
