पणजीः कोंकणी भाशा मंडळान 2025 चे पुरस्कार जाहीर केल्यात. मंडळाच्या 63 व्या वर्धापन दिसा ते भेटयतले. हो सुवाळो मंगळार, 30 सप्टेंबराक सांजेच्या 4 वरांचेर फोंडेच्या राजीव गांधी कला मंदिर, फोंडें जातलो.
पुरस्कार सकयल दिल्ले प्रमाण :
उल्हास आनी मिता वेर्लेकार युवा उद्येजिका पुरस्कार व्हेनीस आल्मेदा. साहित्य पुरस्कार आर्माद फर्नांडीस हांच्या ‘पुला पलतडी’ ह्या पुस्तकाक.
उदय देशप्रभू हांच्या ‘संघर्ष काणी’ ह्या चरित्रात्मक पुस्तकाक रॉक बार्रेटो साहित्य पुरस्कार.
रमेश वेळुस्कार यादस्तीक पुरस्कार चेतन आचार्य हांच्या ‘यादिंचो गांव’ ह्या पुस्तकाक.
अणकार पुरस्कार शैलेंद्र मेहता हांणी अणकारीत केल्ल्या ‘मुंबयचो वेपारी’ पुस्तकाक. बाल साहित्य पुरस्कारा खातीर योग्य पुस्तकां नाशिल्ल्यान परिक्षकांच्या मंडळान नांव सुचयलें ना.
मडगांवच्या कोंकणी भवनांत जाल्ले पत्रकार परिशदेंत वर्धापन दिसाचे कार्यावळीची आनी पुरस्कार विजेत्यांची वळेरी जाहीर केली. हे पत्रकार परिशदेंत अध्यक्ष रत्नमाला दिवकार आनी सचीव मंगलदास भट हांणी संबोधीत केलें.
