कोंकणी साहित्य नभावेयले देदीप्यमान सूर्य, नामनेचे कवी आनी साहित्य अकादमी भाषांतर पुरस्कार विजेते श्री. के. अनंत भट हांचे आज कोच्चींत निधन जालें. कोंकणी भाषा प्रचार सभा आनी कोंकणी केन्द्र – गोश्रीपुर हे संस्थेंचे ते आदले अध्यक्ष आशिल्ले.
“वेळु जात्ता, वेळु जात्ता, करी रे तैयारी ।
खेळु जीवनाचो पळे दीस दोनि – चारि ।।”
म्हणलो तांगेलोच गींत ताणी वेदीचेर आनी मित्रांलागी गेले तीन वर्ष सदा गुंगुनेवून असताले. तानी अंतिम यात्रेक तैयारी करचे वरी आमकां दिसतालें. आनी आज ते कसलोय तरी त्रास घेवनात्तीलें तांगेले जीवन यात्रा सोंपयली.
![anant bhat kochi](http://goenkaar.com/wp-content/uploads/2024/07/WhatsApp-Image-2024-07-12-at-17.12.02.jpeg)
28.09.1939-तु कोच्चींतु जनन. प्राथमिक आनी हैस्कूल शिक्षण कोच्ची टी.डी.स्कूलांत जालें. हिंदी राष्ट्रभाषा, संस्कृत कोविद, गीता विशारद आनी रामायण मध्यमा परीक्षेंतु पारंगत जाले.
संस्कृत, हिंदी, कोंकणी भासांनी खूब साहित्यपरिश्रमु केला. आकाशवाणी धारवाड, मंगळूर पणजी, मुंबय, कालिकट, तिरुवनंतपुरम, आलेप्पी, तृशूर इत्यादी केंद्रांवाटेन हांगेलीं गीतां, कविता, कथा, उल्लोवप आनी संगीतरूपकां प्रसार केल्यां. तुळसीदास, सूरभजनमाला, संगीतरूपकां, कोंकणी गीतमाला, हरुवें पान पिक्कल्ले पान, श्रीरामचरितमानस, फूल आनी कांटो आनी अनंतु – हीं कोंकणी कृतियो उजवाडायल्यां. खूब केसेटांतुय सीडींतुय हांगेलीं गीतां आयकूंक मेळटा.
1980-त भायर आयिल्ले ‘तपस्विनी’ कोंकणी चलचित्रांत हानीं एक सान पात्राचो अभिनयु केला आनी तांगेलें एक गीतव त्या चित्रांत आसपाव केला. यूनियन बेंक ओफ़ इन्डियांत खूब वर्सांची सेवा केलेले उपरंत 1999-तु निवृत्त जाले.
1983-त केरळ कोंकणी अकादमीन ‘फ़रेलोशिप’ दीवनु सन्मानु केलो. 1986-त कोच्ची कोंकणी भाषा प्रचार सभेचो पुरस्कार मेळ्ळो. 1996-त उडुपी के.जी.नायक सांस्कृतिक प्रतिष्ठनान सन्मानु केलो. 2006-त केंद्र साहित्य अकादमीचो कोंकणी अनुवाद पुरस्कारु ‘श्री रामचरितमानस’ अणकाराक प्राप्त जालो. 2012त चेन्नै भजनामृत संस्थेनय गौरवार्पण केलें. हांकां विक्रमाशिला हिन्दी विद्यापीठ हानीं 2013त ‘विद्या वाचस्पती सारस्वत सम्मान’ मान्यता दिलो.
हांगेली धर्मपत्नी श्रीमती. श्रीजया आनी 3 चेरडुवां – दीपा, बालकृष्ण आनी रेखा.