नामनेची कोंकणी लेखिका आनी समाज सेविका आशिल्ली श्रीमती. सुशीला त्रिविक्रम भट हांच्या स्मरणार्थ दर वर्सा दिवुन येंवचे कोंकणी पुरस्कारांचें वितरण ७ डिसेंबराच्या सांजवेळार कोच्ची शारांत कूवप्पाडम हांगाच्या एन गोविंद पै स्मारक ग्रंथालय हॉलांत जालें. कोंकणी केन्द्र गोश्रीपुर, कोंकणी भाषा प्रचार सभा आनी सुशीला त्रिविक्रम भटाच्या कुटुंबान संयुक्तपणान ही कार्यावळ घडोवन हाडली.
कोंकणी केन्द्र गोश्रीपुर संस्थेचे सचीव संध्या वी.प्रभु हांणी संमेलनाक येवकार दिलो. कोंकणी केन्द्र गोश्रीपुर संस्थेचे अध्यक्ष श्री मोहन शेणाय हांणी अध्यक्षपद सांबाळ्ळें. केनरा बँकेचे निवृत्त डीजीएम श्री सन्नकुमार जी प्रभु मुखेल सोयरे आशिल्ले.
तिरुवनंतपुरम दूरदर्शन केंद्राचे सह संचालक डॉ.पी.आर. हरीन्द्र शर्माक कोंकणी सेवा पुरस्कार, श्रीमती. श्रीकला सुखादिया कामताक कोंकणी कृती पुरस्कार, कोंकणी कथा लेखन पुरस्कार श्रीमती. सरस्वती एस प्रभूक आनी कोंकणी कविता लेखन पुरस्कार श्री उमेश टी. भट हांकां फावो जाला. फाटलीं ५३ वर्सां कोंकणी नाटक मळार सक्रीय आशिल्ल्या श्री ए.नारायण शेनॉय हांकां प्रत्येक सेवा पुरस्कार फावो जालो.
श्रीमती सुशीला भट हांणी बरयल्लीं कोंकणी गितां श्रीमती शैलजा राव हांणी गायलीं आनी टीडीएलपी शाळेच्या विद्यार्थ्यांनी सांस्कृतीक कार्यावळींत नाच गायनाचीं सादरीकरणां केल्लीं.
कोंकणी भाषा प्रचार सभेचे संयुक्त सचीव श्री पी. सुरेश पै हांणी उपकाराचें मत सादर केलें.
