पणजी :
‘थोडें बोल्ड थोडें ओल्ड’ काव्यझेल्याचे कवयित्री पृथ्वी नायक हांच्या कविता सामाजिक बांधिलकी आशिल्ल्यो आसात. अशा बरोवप्यांची समाजाक आयज चड गरज आसा, अशें मत साहित्यीक हेमा नायक हांणी उक्तायलें.
सरकारी कला विज्ञान आनी वाणिज्य महाविद्यालय खांडोळा तशेंच सहित प्रकाशनावतीन आयोजित केल्ल्या ‘थोडें बोल्ड थोडें ओल्ड’ काव्यझेल्याच्या उक्तावण सुवाळ्यांत त्यो उलयताल्यो. शिक्षण संचालनालयाचे संचालक भुषण सावयकर आनी हेमा नायक हांचे हस्तुकीं ह्या पुस्तकाचें उक्तावण जालें. सहित प्रकाशनावतीन प्रकाशीत जाल्ल्या ह्या पुस्तकाक गोवा कोंकणी अकादेमीच्या ‘पंयलो चंवर’ येवजणेचें सहकार्य लाभलां.
ह्या वेळार माचयेर गोवा कोंकणी अकादेमीचे उपाध्यक्ष रमेश घाडी तशेंच पुस्तकाचेर उलोवपी गोवा विद्यापीठाच्या मराठी विभागाची सहाय्यक प्राध्यापक दो. पुर्वा वस्त आनी खांडोळें सरकारी महाविद्यालयाची प्राचार्य प्रा. दो. पुर्णकला सामंत, कवयित्री पृथ्वी नायक आनी तिचे आवूय- बापय चंदा आनी चंद्रकात नायक उपस्थित आशिल्ले.
पृथ्वी नायक हांच्यो कविता खूब दर्जेदार आनी प्रगल्भ आशिल्ल्याचें लेखक रमेश घाडी हांणी सांगलें. कोंकणी अकादमीची पयली चंवर येवजण गोंयातल्या गांवा-गांवांनीं युवा लेखकां मेरेन पावून ते वरवीं नव्या दमाचे लेखक तयार जावंक जाय अशें तांणी सांगलें.
डॉ पुर्वा वस्त हांणी सांगलें, पृथ्वी नायक ह्यो समाजभान आशिल्ल्यो लेखिका आसा. त्यांच्या लिखाणांतल्यान स्पश्ट अभिव्यक्ती दिसता. डॉ पुर्वा हांणीं एकंदर ‘थोडे बोल्ड थोडें ओल्ड’ काव्यझेलायचे बारिकसान आनी अभ्यासपूर्ण चित्रण ह्या वेळार केलें.
‘थोडें बोल्ड थोडें ओल्ड’ काव्य झेल्याचे चित्रकार समीर नायक हांणी काडिल्ल्या काडिल्ल्या मुखपृश्टाच्या चित्राचे अनावरण लेगीत ह्या वेळार मानेस्ता हस्तुकीं जालें.
प्राचार्य दो. पुर्णकला सामंत हांणीं येवकाराचें जाल्यार उप प्राचार्य दो. डिलॅक्टा डिकॉस्टा हांणी उपकाराचें उलोवप केलें. स्नेहा नायक हांणी कार्यावळीचें सुत्रसंचालन केलें.
